Алматыда Қазақстан мұсылмандары діни басқармасының төрағасы, Бас мүфти Ержан қажы Малғажыұлы "Қазақстан" мейрамханасында ауызашар берді, - деп хабарлайды Tengrinews.kz тілшісі ҚМДБ баспасөз қызметіне сілтеме жасап.
Ауызашарға Алматы қаласының әкімі Ахметжан Смағұлұлы, ел ағалары, ақындар, ардақты аналар, БАҚ және телеарна төрағалары, мемлекеттік мекеме қызметкерлері - жалпы 200-ге тарта адам келіп, жайылған дастарханнан дәм татты.
Жиналған көпшілікті қасиетті рамазан айымен қала әкімі Ахметжан Смағұлұлы құттықтап, тілегін айтты. Бас мүфти Ержан қажы Малғажыұлы жиналған қауымға шынайы лебізін білдіріп: "Рамазан рухани-жаңару айы. Адамды тазалыққа, қоғамды рухани келісімге шақыратын рамазан айының маңызы аса жоғары. Алла Тағала айлардан-рамазанды, күндерден-жұманы, түндерден - Қадір түнін қасиетті етті. Мұсылман баласы үшін бұл айдың орны ерекше. Қасиетті айда ұстаған оразамыз, жасаған дұға-тілектеріміз, құлшылық-ғибадаттарымыз, әрбір қайырлы амалдарымыз қабыл болғай. Алла Тағала отбасымызға амандық, елімізге береке-бірлік нәсіп еткей", - деді.
Ауызашарда ҚМДБ-ның төраға орынбасары, "Әзірет Сұлтан" мешітінің Бас имамы Серікбай қажы Сатыбалдыұлы рамазан айының қадір-қасиеті туралы уағыз насихат айтты. Сонымен қатар, ауызашар кешін ақындар жырмен әрлеп, елге танымал әншілер тағылымды термелер орындады.
