2017 жылы ЭКСПО алаңында ғылым және технологиялар бойынша бірінші ИЫҰ саммитін өткізу күтілуде, - деп хабарлады ЮНЕСКО және ИСЕСКО істері жөніндегі Ұлттық комиссия хатшысы Әсел Өтегенова ОКҚ-дегі баспасөз конференциясында.
Айта кетер болсақ, Азия парламентаралық форумы Астанада 26-27 қыркүйекте өтеді. Шара ғылым, технология және инновация мәселелеріне арналады.
"Форум аясында Ислам ынтымақтастық ұйымына (ИЫҰ) кіретін және кірмейтін мемлекеттерде ғылым, технология және инновация салаларында нормативтік-құқықтық база және ынталандырушы шаралар үлгісінде үздік зерттеулердің таныстырылымын өткізу көзделуде", - деді Ә.Өтегенова.
Оның айтуынша, форумға 25 елдің Парламент өкілдері мен сарапшылар, сондай-ақ, алты халықаралық ұйымның мүшелері қатысады деп күтілуде.
Айта кетейік, білім, ғылым және мәдениет мәселелері бойынша Ислам ұйымы (ИСЕКО) 1982 жылы 3 мамырда құрылған. Қазақстанның ИСЕСКО-мен ынтымақтастығы 1996 жылы басталды. ИСЕСКО штаб-пәтер Рабат қаласында орналасқан (Марокко Корольдігі).
Аса маңызды шараның ұйымдастырушылары: Қазақстан Республикасы Парламентінің Мәжілісі, Білім, ғылым және мәдениет мәселелері бойынша Ислам ұйымы (ИСЕСКО) және Ислам даму банкі (ИДБ).