Полиция қарақшылық шабуыл жасаған күдіктіні іздестіріп жатыр, - деп хабарлайды Tengrinews.kz тілшісі Алматы ІІД баспасөз қызметінің өкіліне сілтеме жасап.
Алматы қаласының Әуезов аудандық ІІБ қызметкерлері 11 сәуірде түнгі уақытта Яссауи көшесінде ауыр қылмыс жасаған күдіктіні ұстау үшін жедел-іздеу шараларын жүргізіп жатыр. Полиция мәліметінше, қарақшылық шабуыл жасаған қаскүнем Toyota Camry автомобилін мініп кеткен.
"Қылмыскер ұрланған көлікпен Жамбыл облысына қарай беттеген. Алайда 157-ші шақырымда Алматы - Бішкек тасжолында ол жол апатына ұшырап, оқиға орнынан қашып кеткені анықталды. Бір нұсқа бойынша, ол басында бет алған бағытында жүруді жалғастырған", - деді ІІД өкілі.
Полиция сол аймақтан азият нәсілді, болжаммен 30-35 жастағы ер адамды жолдан алып кеткендер болса полицияға хабарласуды сұрайды.