Беларусь президенті Александр Лукашенко қазанның 24-25 аралығында ресми сапармен Қазақстанда болады. Бұл туралы беларусиялық көшбасшысының сайтында жарияланған, - деп хабарлайды Tengrinews.kz тілшісі.
Нұр-Сұлтанда Александр Лукашенко Қазақстан Президенті Қасым-Жомарт Тоқаевпен келіссөздер жүргізеді. Екі ел басшылары екі ел арасындағы сауда-экономикалық қарым-қатынасты талқылайтын болады.
Тоқаев пен Лукашенко өнеркәсіптік кооперацияны кеңейту, экономиканың түрлі салаларында, соның ішінде ауыл шаруашылығында, көлік пен логистикада, мұнай-химия кешенінде, жоғары технологиялар саласында ынтымақтастықты арттыру перспективаларын қарастырады.
Тараптар сондай-ақ, интеграциялық бірлестіктер аясындағы және халықаралық алаңдардағы ынтымақтастықты, өңірлік және әлемдік күн тәртібін талқылайды. Келіссөздер қорытындысы бойынша екі жақты келісімдер пакетіне қол қойылады.
Сол күндері Нұр-Сұлтанда Қазақстан - Беларусь бизнес-форумы өтеді. Қазақстан астанасында Беларусь дипломатиялық миссиясы ғимараттарының жаңа кешенін ашу жоспарланған.