+7 (777) 001 44 99
Қазақша
Русский
English
Талдықорған шетінде екі қабатты жеке тұрғын үйде 31 желтоқсанда жарылыс болды. Салдарынан бір отбасының жеті мүшесі, оның ішінде кәмелетке толмаған үш бала, күйік және жарақатпен ауруханаға жеткізілді, - деп хабарлайды Tengrinews.kz тілшісі.
Жетісу облыстық ТЖД мәліметінше, жарылыс нәтижесінде үйдің екінші қабаты, кейбір қабырғалары және шатыры құлаған. 120 шаршы метр аумақта өрт тұтанып, ол жойылды.
"Өрттің алдын ала себебі – табиғи газдың ағуынан газ-ауа қоспасының тұтануы. Зардап шеккендердің барлығы әртүрлі дәрежедегі күйік алған", – деп хабарлады Жетісу облысы ТЖД баспасөз қызметі.
Газ сұйықтығының ағуы үйдің өзінде немесе газ құбырының жерасты магистралі бойында болғаны әлі анық емес. Оқиғаға байланысты Қылмыстық кодекстің 306-бабы 2-бөлігі ("Қауіпсіздік талаптарына сай келмейтін тауарларды шығару немесе сату, жұмыстарды орындау немесе қызметтер көрсету") бойынша қылмыстық іс қозғалды.
Зардап шеккендердің жағдайы туралы аймақтың денсаулық сақтау басқармасы әзірге мәлімет бермеді. Анық болғандай, жеті адамның барлығы бір отбасының мүшелері, олар әртүрлі медициналық мекемелерге жатқызылған. Олардың үшеуі – жас балалар.
Оқиға орнында жергілікті газ компаниясының мамандары мен құқық қорғау органдары жұмыс жасады. Тергеуді облыстық полиция департаменті жүргізіп жатыр. Қажетті сараптамалар тағайындалды.
Қазақстан ТЖМ мәліметінше, өткен тәулікте елде өрт сөндірушілер 158 шақыртуға шыққан, оның 88-і өрт және жану оқиғаларына, 70-і іздестіру-құтқару және басқа да жұмыстарға байланысты болған. 25 адам, оның ішінде 8 бала құтқарылып, эвакуацияланған.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
