+7 (777) 001 44 99
Қазақша
Русский
English
Бүгін Астанада Мәжіліс пен Сенаттың бірлескен отырысы өтті. Депутаттар мен бірқатар министрлер, сондай-ақ БАҚ өкілдері Үкімет үйінде жиналды, - деп хабарлайды Tengrinews.kz тілшісі.
Мәжіліс спикері Ерлан Қошанов Парламенттің сегізінші шақырылымының IV сессиясын ашық деп жариялады. Бұл туралы депутаттар мен Үкімет мүшелерінен сұрақтар болмады, бір депутат ғана қарсы болды. Жаңа сессия басталар алдында Қазақстанның Әнұраны орындалып, кейіннен бірлескен отырыс жабық деп жарияланды. Жалпы жиын небәрі бес минутқа ғана созылды.
Екі айлық демалыстан кейін ресми түрде жұмысқа кіріскен депутаттар кулуар қабырғасында күзгі маусым мінберде қандай тақырыптар көтеретіндерімен бөлісті.
"Менің тақырыбым қылмыстық заңнама, 2023 жылы депутат болып сайланғаннан бері көтеріп келе жатқан "жеке детективтік қызмет" туралы заңым оң қорытындымен келді. Осы заң жобасын ары қарай қолыма алып жүргіземін деп сенемін. Одан кейін биыл Антикор таратылып, ҰҚК құрамына қосылды. Осыған байланысты құқық қорғау органдарын қорғау туралы заңды қайта қарастыруымыз керек болады. Қылмыстық заңнаманы жетілдіру заңнамасына қатысты ұсыныстарым мен жұмыстарым дайын", - деп пікір білдірді Мәжіліс депутаты Абзал Құспан.
Белгілі болғандай, Мемлекет басшысы Қасым-Жомарт Тоқаев халыққа Жолдауын 8 қыркүйекте Мәжіліс пен Сенаттың бірлескен отырысында жасайды. Дәстүрлі түрде Президент саяси сессияның ашылуында сөз сөйлейтін, алайда биыл ол Қытайға Си Цзиньпиннің шақыруымен барғандықтан, Жолдау бір аптаға шегерілді. Осылайша, алдағы аптада депутаттар мен Үкімет мүшелері Астанада тағы да жиналады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
