+7 (777) 001 44 99
Қазақша
Русский
English
Қостанайда зейнеткер ерлі-зайыпты өрттен кейін палаткада тұруға мәжбүр, - деп хабарлайды Tengrinews.kz тілшісі "Наша газета" порталына сілтеме жасап.
31 мамырда төрт пәтерлі үйде болған өрттен кейін ерлі-зайыпты далада қалды. Олар көмек сұрап әкімдікке жүгінген. Алайда әзірге бір реттік жәрдемақтан басқа еш көмек алмаған.
Зардап шеккен Күлімхан Сыбанқұлованың айтуынша, өрт қараусыз қалған пәтерден басталып, үйдің шатырын және көрші үйлерді шарпыған.
"Тек ас үйім қалды, сонда шай ішеміз. Күйеуіммен бірге палаткада ұйықтаймыз. Ол - үшінші топтағы мүгедек, ал мен - көпбалалы зейнеткермін", – дейді әйел.
Өрттен кейін тұрғындар әкімдікке жүгінген, алайда олардың сөзінше, шенеуніктер нақты әрекетке көшпеген.
"Әкімдіктегілер "қарастырып жатырмыз, бақылауда" деді. Екі апта өтті, ешкім келген жоқ, үнсіз отыр. Қандай бақылау? Үйді тіпті көрген де жоқ. "Жаңа үй іздеп жатырмыз, болмаса жөндеуге демеуші табамыз" деді. Бірақ бәрі - өртсөндірушілер де, тергеу комитеті де бұл үйді қалпына келтіруге болмайтынын айтты. Ішкі қабырғалар түгел су болған", – дейді Күлімхан Сыбанқұлова.
Портал мәліметінше, бұл үй бір жарым жыл ішінде екі рет өртенген. Бірінші өрт те сол пәтерден шыққан. Ол кезде онда әйел тұрған, өртке газ баллонының жарылуы себеп болған. Сол жолы әкімдік тез арада шатырды жөндеп берген, ал қалған жөндеу жұмыстарын тұрғындар өздері несие алып жүргізген.
Қазір өрттің нақты неден шыққаны тергеу аяқталғаннан кейін белгілі болады.
Айта кетейік, бұған дейін Талдықорғанда болған оқиға туралы жазған едік. Онда жекеменшік үйдегі жарылыстан кейін 23 жастағы жігіт ата-анасы мен ағасынан айырылып, бауырларының қамқоршысы атанған.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
