+7 (777) 001 44 99
Қазақша
Русский
English
Павлодар облысында тасжолда болған жантүршігерлік жол апатынан тоғыз адам зардап шекті, оның үшеуі оқиға орнында қаза тапты. Полиция жол-көлік оқиғасының себептері мен мән-жайын анықтап жатыр, - деп хабарлайды Tengrinews.kz тілшісі.
Оқиға орнынан түсірілген фото мен видео әлеуметтік желілерде пайда болды. Кадрларда жеңіл көліктің өртеніп жатқаны, ал сәл әріректе түгі қалмаған тағы бір көлік тұрғаны көрінеді. Жарияланған суреттерден апат салдарынан трассада қозғалыс біраз уақытқа тоқтап қалғаны байқалады. Жеңіл және жүк көліктерінен кептеліс пайда болған.
Павлодар облыстық полиция департаментінің баспасөз қызметінің мәліметінше, жол апаты 5 шілдеде Павлодардан 37 шақырым жерде болған.
"Екі көлік соқтығысып, нәтижесінде үш адам қаза тапты. Бұл дерек бойынша қылмыстық іс қозғалды. Оқиғаның себептері мен мән-жайы тергеу барысында анықталады. Оқиға орнында полиция қызметкерлері жұмыс істеп жатыр", – деді департаменттің баспасөз қызметі.
Облыстық денсаулық сақтау басқармасының мәліметінше, апат салдарынан үш көліктің жолаушылары зардап шеккен.
"Үш автокөлік соқтығысып, екеуі өртеніп кеткен. Оқиға орнына үш жедел жәрдем бригадасы мен апаттар медицинасы орталығының арнайы тобы барды. Үш адам оқиға орнында қаза тапты, алты адам жарақат алды, олардың ішінде 17 жастағы жасөспірім де бар", – деді басқармадағылар.
Дәрігерлердің айтуынша, зардап шеккендердің екеуі қазір жансақтау бөлімінде ауыр жағдайда жатыр. Тағы бір адам жақ-бет хирургиясы бөліміне түскен, қалғандары амбулаториялық емдеуге жіберілген.
Басқа зардап шеккендер облыстың медициналық мекемелеріне жатқызылды. Екі адамның жағдайы ауыр деп бағаланып жатыр.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
