02 шілде 2019 | 14:45

2019 жылға арналған республикалық бюджеттің негізгі параметрлері өзгеріссіз қалады

Айдос Қосыбаев

ҚР премьер-министрі Асқар Маминнің төрағалығымен өткен Үкімет отырысында премьер-министрдің бірінші орынбасары - қаржы министрі Әлихан Смайылов 2019 жылға арналған республикалық бюджетті нақтылау жөніндегі заң жобасын таныстырды, - деп хабарлайды Тengrinews.kz тілшісі Үкімет баспасөз қызметіне сілтеме жасап.

ҚР премьер-министрі Асқар Маминнің төрағалығымен өткен Үкімет отырысында премьер-министрдің бірінші орынбасары - қаржы министрі Әлихан Смайылов 2019 жылға арналған республикалық бюджетті нақтылау жөніндегі заң жобасын таныстырды, - деп хабарлайды Тengrinews.kz тілшісі Үкімет баспасөз қызметіне сілтеме жасап.

Әлихан Смайыловтың айтуынша, Мемлекет басшысының қазақстандықтардың әл-ауқатын арттыру және әлеуметтік мәселелерді шешу жөніндегі тапсырмаларын іске асыру, сондай-ақ, Президенттің 26 маусымдағы "Қазақстан Республикасы азаматтарының борыш жүктемесін азайту шаралары туралы" Жарлығын іске асыру мақсатында Үкімет 2019 жылға арналған республикалық бюджетті нақтылау жөніндегі заң жобасын әзірледі.

"Нақтылауды биылғы сәуір айында түзетілген, 2019 жылға арналған еліміздің әлеуметтік-экономикалық даму болжамының көрсеткіштерін сақтай отырып жүргізу ұсынылады", - деді Әлихан Смайылов.

2019 жылға арналған республикалық бюджеттің негізгі параметрлері өзгеріссіз қалады: түсімдер - 10,5 триллион теңге; шығыстар - 11,9 триллион теңге; тапшылық - 1,4 триллион теңге немесе жалпы ішкі өнімге 2,1 пайыз.

Президенттің тапсырмаларын қаржылық қамтамасыз ету Тікелей инвестициялар қорын құруға көзделген қаражаттың бір бөлігін қайта бөлу есебінен іске асырылатын болады (370 миллиард теңгеден 300 миллиард теңге).

Бюджеттің шығыс бөлігін нақтылау үш бағыт бойынша жүзеге асырылды.

Бірінші. Халықтың тұтынушылық несиелері бойынша борыш жүктемесін азайту.

Өмірлік қиын жағдайда қалған азаматтар санатына жатқызылған әрбір қарыз алушы үшін тікелей және атаулы қаржылық көмек ретінде мемлекет 300 мың теңгеге дейінгі жалпы мөлшерде негізгі борышты және ол бойынша есептелген сыйақыны өтейді. Осы мақсаттарға жоба 88,5 миллиард теңге сомасында шығыстарды қарастырып отыр.

Екінші. Жұмыспен қамту, аз қамтылған, көп балалы отбасылар мен жастарды қолдау бойынша пәрменді шараларды кеңейту және күшейту.

Бұл мақсаттарға 138,6 миллиард теңге бағытталатын болады, оның ішінде: 1,5 миллиард теңге осы жылдың 1 қыркүйегінен бастап аз қамтылған және көп балалы отбасылардан шыққан балалар үшін жоғары оқу орындарына қосымша 5 мың білім беру гранттарын бөлуге; 2,4 миллиард теңге осы жылдың 1 қыркүйегінен бастап техникалық және кәсіптік білім беруде жұмысшы мамандығы бойынша оқып жүрген студенттердің стипедиясын 30 пайызға ұлғайтуға. Бұл 122 мың оқушыны қамтиды; 49,2 миллиард теңге "Бастау Бизнес", қысқа мерзімді кәсіптік білім беру тетіктері арқылы жұмыссыздар мен өзін-өзі жұмыспен қамтығандарды жұмыспен қамтуға жәрдемдесу шараларымен қамтамасыз етуге, сондай-ақ "Еңбек" бағдарламасы бойынша ауылдарда шағын несие беру көлемін және стартап жобаларға берілетін гранттар санын ұлғайтуға; 14,4 миллиард теңге Нұр-Сұлтан, Алматы, Шымкент қалаларында 10 мың адамды қамти отырып жұмыс істейтін жастар үшін сатып алу құқығынсыз жалға берілетін тұрғын үй салу көлемін 1 мың пәтерден 3 мың пәтерге дейін ұлғайтуға; 70 миллиард теңге атаулы әлеуметтік көмек төлемдерін осы жылдың 1 сәуіріне көшіруге байланысты қаражаттың қажеттілігін жабуға; 1,1 миллиард теңге техникалық және кәсіптік білім беру мекемелері, жоғарғы оқу орындары студенттерін оқытуға.

Үшінші. Жобада Үкімет резервін 72,9 миллиард теңгеге ұлғайту ұсынылады. Аталған қаражаттың бір бөлігі Арыс қаласындағы төтенше жағдайдың салдарларын жоюға бағытталатын болады.

Бұдан өзге, 35,9 миллиард теңге көлемінде қаражатты ішкі қайта бөлу есебінен кейінге қалдыруға болмайтын шешімдерді талап ететін бірқатар міндеттемелер қаржыландырылатын болады.

"Барлық әзірленген әлеуметтік шаралар маңызды. Заң жобасын Парламент қарауына бағыттауды ұсынамыз", - деп түйіндеді Әлихан Смайылов.

Мемлекет басшысының Жарлығын іске асыру, соның ішінде кепілсіз тұтынушылық займ беруді реттеу шаралары бойынша Ұлттық банк қабылдап жатқан қосымша шаралар туралы Ұлттық банк төрағасы Ерболат Досаев айтып берді.

Оның айтуынша, Қазақстан Республикасының Президенті Қасым-Жомарт Тоқаевтың "Қазақстан Республикасы азаматтарының борыш жүктемесін азайту шаралары туралы" Жарлығын іске асыру мақсатында ҚР Ұлттық Банкі Үкіметпен, банктермен және шағын қаржы ұйымдарымен бірлесіп, 2019 жылғы 1 маусымдағы жағдай бойынша кепілсіз тұтынушылық қарыздар бойынша 300 мың теңгеден аспайтын сомада өмірлік қиын жағдайда қалған азаматтардың берешегін өтеу тетігін әзірледі.

Бюджет соңғы жаңалықтар