Бірінші жартыжылдықтың қорытындысы бойынша теңгенің долларға шаққандағы бағамы 5,1 пайызға нығайды. Үкімет отырысында Ұлттық банк төрағасы Тимур Сүлейменов бұның себептерін мәлімдеді, деп хабарлайды Tengrinews.kz.
Ұлттық банк басшысының айтуынша, теңге бағамының оң динамикасы бірден бірнеше фактордың нәтижесі болды.
"Бірінші жартыжылдықта теңге долларға шаққанда 5,1 пайызға нығайды. Бұған қатаңдау ақша-кредит саясаты, резидент еместердің Қазақстанның мемлекеттік бағалы қағаздарына деген жоғары сұранысы, Үкімет пен Ұлттық банктің инфляцияны төмендету бойынша бірлескен шаралары, сондай-ақ қолайлы сыртқы конъюнктура ықпал етті", - деді Сүлейменов.
Бұдан бұрын Ұлттық банк теңгенің нығаюын ішкі және сыртқы факторлардың ұштасуымен түсіндірген болатын. Олардың қатарында - доллардың әлемдік индексінің төмендеуі, мұнай бағасының өсуі, Ұлттық қордан шетел валютасын сату, квазимемлекеттік сектор субъектілерінің валюталық түсімінің бір бөлігін міндетті түрде сатуы, сондай-ақ инвесторлардың теңгелік активтерге деген қызығушылығын қолдайтын жоғары базалық мөлшерлеменің сақталуы бар.