+7 (777) 001 44 99
Қазақша
Русский
English
Қазақша
Русский
English
Ресейде қыздыру шамдарына қатысты 2009 жылы енгізілген тыйымнан бас тарту ұсынылды, - деп жазады "Известия". Мемлекеттік думаның энергетика жөніндегі комитеті тиісті заң жобасын әзірледі.
"Біз азаматтардан көп өтініш қабылдадық, олар үшін қуатүнемдегіш шамдардың құны тым қымбатқа түсіп отыр - өйткені олар бұрынғы электр шамдарынан он, тіпті, одан да көп есе қымбат, оның үстіне өткен жылы біз электрді тұтынуда қуаттың үнемделгенін байқамадық", - дейді Мемлекеттік думаның энергетика жөніндегі комитетінің мүшесі Андрей Крутов.
Оның айтуынша, ескірген, энергетикалық жағынан тиімсіз өнеркәсіп жабдықтары мен электр желілері энергия үнемдейтін шамдардың тиімділігін жойып отыр. "Біз халықтың есебінен ескірген инфрақұрылымның энергетикалық тиімділігін арттырмақ болдық, ал ол инфрақұрылымды ауыстыруды ешкім ойлаған жоқ", - дейді Крутов.
Депутат қуатүнемдегіш шамдардың қоршаған ортаға айтарлықтай зиян келтіретіні туралы сарапшылардың пікірімен де бөлісті. Ресейде әлі күнге дейін мұндай шамдарды залалсыздандыратын пункттер ашылған жоқ. "Айналып келгенде денсаулыққа зиянды сынабы бар шамдар кәдімгі қоқыспен бірге лақтырылып жатыр, одан экологияға нұқсан келеді. Сарапшылардың көбі бұл шамдардан болатын сәулеленудің әсерінен көзге зиян келетінін айтады", - дейді Крутов.
Қыздыру шамдарына қатысты тыйым 2009 жылы сол кезде президент болған Дмитрий Медведевтің бастамасымен қабылданған еді. Қазақстанда электр қыздыру шамдарын өндіру мен сатуға 2012 жылдан бастап, кезең-кезеңмен тыйым салынатыны айтылған болатын.
