12 мамыр 2022 | 13:20

Қазақстандық спортшы Сурдлимпиада ойындарының жеңімпазы атанды

Гүлнара Досымшалова Корреспондент

Қазақстандық спортшы Сурдлимпиада ойындарының жеңімпазы атанды, - деп хабарлайды Tengrinews.kz тілшісі.

Бразилияда өтіп жатқан XXIV Жазғы Сурдлимпиада ойындарында грек-рим күресінен жарыс аяқталды. 130 келі салмақта ел намысын қорғаған Хайратхаан Шонку финалда түркиялық қарсыласы Мехмет Юсалды айқын басымдықпен жеңіп, алтын медаль иегері атанды.

Сонымен қатар, 97 келіде Асылжан Тәжиев ирандық спортшыдан жеңіліп, жарысты күміс медальмен қорытындылады. Ал Нұржан Асан (77 келі), Алдияр Балташев (60 келі) ел қоржынына қола медальдан салды.

Грек-рим күресінен ұлттық құраманың бас бапкері Ерлан Мұқажан спортшылардың нәтижесіне оң баға берді.

"Көптеген оқу-жаттығу жиынының арқасында осындай нәтиже көрсеттік. Бір алтын, бір күміс, екі қола жүлде біз үшін үлкен жетістік. Дайындығымызды жақсартып, келесі Сурдлимпиада ойындарында бұдан да жақсы нәтиже көрсететінімізге сенімдімін", - деді бас бапкер.

Есту қабілеті нашар спортшылар арасындағы төрт жылдық жарыс 16 мамырға дейін жалғасады. Қазақстан құрамасының қоржынында 1 алтын, 4 күміс және 17 қола медаль бар.

Сілтемесіз жаңалық оқисыз ба? Онда Telegram желісінде парақшамызға тіркеліңіз!

спорт спортшы Әлем чемпионаты

TENGRI travel