+7 (777) 001 44 99
Қазақша
Русский
English
Бүгін, маусымның 2-сі күні Астанадағы №61 мектепте балабақша орындарын тарату науқаны басталды, деп хабарлайды Tengrinews.kz тілшісі Астана қалалық білім беру басқармасының бастығы Эльмира Суханбердиеваға сілтеме жасап.
Оның хабарлауынша, биыл балабақшаны бітірген балалар баршылық. Осыған байланысты қала бойынша 5 800 орын босады. Соның барлығы кезекке сәйкес таратылатын болады. Барлық орындардың 20-25 пайызы әлеуметтік жеңілдікпен берілсе, қалғаны 2-6 жас аралығындағы бүлдіршіндер арасында таратылады.
Қазіргі заңнамаға сәйкес, балабақшаға алдымен 1-2 топтағы мүгедек ата-аналары бар балаларға, ата-ананың қамқорлығынсыз қалған сәбилерге, жетім балаларға, көпбалалы отбасыдан шыққандарға, соғыс ардагерлері мен мүгедектердің балаларына, содан соң әскери қызметкерлердің бала-шағасына беріледі.
Астана қаласы бойынша балабақша орындарын тарату науқаны шілденің 2-сіне дейін жалғасады. Осыдан кейін ата-аналарға жолдамалар беріледі. №61 мектепте сағат 15-00-ден 18-00-ге дейін жұмыс істейтін арнайы комиссия күніне 300 адамды қабылдаймыз деп отыр.
