Тбилисидегі су тасқыны кезінде қашып шыққан пингвин жанармай құю бекетінен табылды

Тбилисидегі су тасқыны кезінде хайуанаттар бағынан қашып шыққан пингвин жанарай құю бекетінен табылды, - деп хабарлайды РИА Новости. 17 маусымда табылған пингвин хайуанаттар бағына қайтарылды. 

Еске сала кетейік, маусым айының ортасында болған су тасқынынан Тбилисидегі хайуанаттар бағының 300-ден астам жануары өлген болатын. Бақтан қашып кеткен жануарларды арнайы жасақ қызметкерлері өлтірген. "Хайуанаттар бағында 600-ге таяу мекендеуші болған, жартысынан көбі өлді. Қашып кеткен жыртқыштардың жартысы өлтірілді, жартысы арнайы қауіпсіз жерге тасымалданды. Қазіргі уақытта тазалау жұмыстары жүргізіліп жатыр", - деп мәлімдеді мекеме әкімшілігінің өкілдері.

Сонымен қатар, Тбилисидегі су тасқынынан келген шығынның көлемі 40 миллион лари, яғни 18 миллион доллар екендігі анықталды.