Түркияда қазақстандық суретшілердің "Ұлы дала рухы" көрмесі өтіп жатыр

02 Желтоқсан 2018, 11:13
0
Түркияда қазақстандық суретшілердің "Ұлы дала рухы" көрмесі өтіп жатыр - Сурет Ә. Қастеев атындағы өнер музейінің баспасөз қызметінен
Сурет Ә. Қастеев атындағы өнер музейінің баспасөз қызметінен

2018 жылы 26 қараша - 10 желтоқсан аралығында Көш тарихы музейінде (Бурса, Түркия) "Рухани жаңғыру" бағдарламасының аясында "Ұлы дала рухы" көрмесі өтіп жатыр, - деп хабарлайды Тengrinews.kz тілшісі Ә. Қастеев атындағы өнер музейінің баспасөз қызметінің жетекшісі Клара Исабаеваға сілтеме жасап. 

Көрме ХХ ғасырдың аяғы және ХХI ғасырдың басындағы қазақстандық суретшілердің 32 кескіндемелік және графикалық жұмыстарын ұсынады. Көрме ҚР Мәдениет және спорт министрлігімен, халықаралық ТҮРКСОЙ ұйымымен және Ә. Қастеев атындағы ҚР Мемлекеттік өнер музейімен ұйымдастырылған. Мұның алдында көрме 14 қарашадан 24 қарашаға дейін Түркияның астанасы Анкарада сәтті өтті. 

Нұрсұлтан Назарбаевтың "Ұлы даланың жеті қыры" мақаласында былай делінген: "Қазақстан - күллі түркі халықтарының қасиетті "Қара шаңырағы". Бүгінгі қазақтың сайын даласынан әлемнің әр түкпіріне тараған түркі тектес тайпалар мен халықтар басқа елдер мен өңірлердің тарихи үдерістеріне елеулі үлес қосты"

Көрменің салтанатты ресми ашылуында Бурса қаласының вице-мэрі Яшар Элмаз, Бурса қаласының мәдениет басқармасының жетекшісі Азиз Елбаш, ТҮРКСОЙ-дың бас хатшысы Дүйсен Қасеинов, ТҮРКСОЙ-дың бас маманы Асқар Тұрғанбаев, Ә. Қастеев атындағы өнер музейінің баспасөз қызметінің жетекшісі Клара Исабаева, музей директорының жалпы және ұйымдастыру мәселелері жөніндегі орынбасары Нұржан Сатыбалды қатысты. Көрменің Бурсаның ең үздік, заманауи, техникалық жабдықталған музейлерінің бірі "Көш тарихы музейінде" өтуіне Бурса мэрі, Бурсаның қалалық мәдениет басқармасы мен ТҮРКСОЙ жан-жақты көмек көрсетіп, себепкер болды.

"Ұлы Дала рухы" көрмесі көшпенділер мәдениетінің, қазақтың тұрмыс дәстүрі, ұлттық ат-спорттық ойындары, дәстүрлері мен әдет-ғұрыптарының бірегей ерекшелігін көрсетеді. Ол қазіргі заманғы түркітілдес елдердің бейнелеу өнері, өткенге, тарихқа, оның аумағында болған ежелгі өркениеттерге, қазіргі заманғы адамзат проблемаларына және рухани ізденістерге деген үлкен қызығушылығының айқын үлгісі болып табылады.

32 кескіндеме және графика туындылары түрік көрермендері мен Бурсаның қонақтарын қазақстандық Евгений Сидоркин, Әбдірашит Сыдыханов, Дулат Әлиев, Ғани Баянов, Бахыт Бапишев сынды өнер шеберлерінің, сондай-ақ Марат Бекеев, Шамиль Гулиев, Нелли Бубэ, Асқар Есдәулет, Алмагүл Меңлібаева, Андрей Нода, Гүлжамал Тагенова, Алпысбай Қазығұлов және Вячеслав Люй-Ко сияқты қызықты заманауи суретшілердің шығармашылығымен таныстырады.        

Бурса - Түркиядағы көлемі жағынан Стамбул, Анкара, Измирден кейінгі Мәрмәр теңізінің жағалауына жақын Улудаг тауының (2500 м) етегінде орналасқан төртінші қала. Бурса қаласы б.з.д. 2 ғасырда Вифиния облысында құрылды және өркендеуші мегаполиске айналды. Мұндай өркендеуге атақты Ұлы Жібек жолының өтуі үлкен ықпал етті. 14 ғасырға шейін мұнда византиялықтар билік жүргізді, кейін оларды селжұқтар ығыстырып Бурсаны Осман империясының алғашқы астанасына айналдырды. Бурса өзінің мешіттерімен, Осман империясының ерте кездегі монументтерімен, көптеген саябақтары мен әдемі тау бөктеріндегі ормандарымен танымал. XIV ғасырдағы Ұлы-Жәми мешіті (Үлкен мешіт) селжұқ стиліндегі 20 күмбезі мен қақпасымен өзіне назар аудартады.

Түркі мәдениетінің халықаралық ұйымы (ТҮРКСОЙ) түркі елдерінің әдебиеті мен өнері саласында түркі мұрасын сақтау мен түркі халықтарының нығаюына бағытталған көптеген жобаларды жүзеге асырып келеді. 2008 жылдан бастап бүгінге дейін Түркі мәдениетінің халықаралық ұйымының (ТҮРКСОЙ) Бас хатшысы қазақ музыканты, профессор, дипломат әрі қоғам қайраткері Дүйсен Қорабайұлы Қасеинов болып табылады.

Получить короткую ссылку


  • Подписаться на канал новостей TengriNews:

  • Google News
  • Yandex News
  • Yandex Zen

Нравится Поделиться
Пікір қалдырыңыз
Оқылып жатыр
Талқыланып жатыр
Бүгін
Апта
Ай