+7 (777) 001 44 99
Қазақша
Русский
English
Батыс Қазақстан облысында тағы бір ауылды су басты. Бөрлі ауданында төтенше жағдай жарияланды, - деп хабарлайды Tengrinews.kz тілшісі "Хабар 24" арнасына сілтеме жасап.
Арна мәліметінше, Ақсай қаласының іргесіндегі Қызылтал елді мекенінде жекеменшік үйлерге зақым келген. Төтенше жағдайлар департаменті мәліметінше, 12 баспанаға су кіріп, 8 адам қауіпсіз жерге шығарылған. Оның төртеуі бала.
"Тұрғындардың көбі туыстарының үйін паналап отыр. Су басқан ауылға 83 қызметкер мен 30 арнайы техника жұмылдырылған. Бөрлі ауданында төтенше жағдай жарияланды. Ақсайдағы №7 мектеп ғимаратында эвакуациялық орталық жасақталған", - делінген хабарламада.
Өңір бойынша барлығы 87 адам қауіпсіз жерге көшірілген. Тасқын қаупі сейілмей тұр, делінген арна материалында. "Қазавтожол" мамандары мен құтқарушылар су шайған учаскелерде тиісті жұмыстарды жүргізіп жатыр.
Айта кетейік, кеше, 2 сәуірде Қаратөбе мен Шыңғырлау аудандарында да төтенше жағдай жарияланған еді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
