Әлемдік мұнай тасымалына қайтадан қауіп төнді: баға құбылып тұр

Оман жағалауында жүк кемесіне снаряд тигені туралы хабардан кейін мұнай бағасы 2 пайызға өсті. Осыдан кейін БҰҰ бұғаздан кемелерді эвакуациялауды тоқтатты - әлемдік мұнай жеткізіліміне тағы да қауіп төнді. Кемелер өткелі қайта ашылған соң баға біртіндеп төмендей бастады, деп хабарлайды Tengrinews.kz тілшісі Reuters агенттігіне сілтеме жасап.

Brent маркалы мұнай фьючерстері 1,52 долларға немесе 2,1 пайызға қымбаттап, барреліне 75,26 доллар деңгейінде жабылды, ал американдық West Texas Intermediate мұнайы 1,58 долларға немесе 2,3 пайызға өсіп, 71,92 долларды құрады.

Сәрсенбі күні мұнай бағасының екі эталондық көрсеткіші де соғыс басталғанға дейінгі күннен, яғни 27 ақпаннан бергі ең төменгі деңгейде жабылды, бірақ кемелерді эвакуациялауды тоқтату туралы мәліметтерден кейін баға қайтадан көтерілді.

"Мексика шығанағындағы мұнай сақтау резервуарлары шамамен 50-60 пайызға толған, сондықтан егер жақын арада бұғаз арқылы танкерлер қозғалысы артпаса, өндірушілер өндіріс көлемін азайтуға мәжбүр болады, ал толық қалпына келу келесі жылы болады", - делінген Rystad Energy консалтингтік компаниясы сарапшыларының есебінде.

Азия биржаларындағы таңғы сауда-саттықта мұнай бағасы төмендеді.

Сарапшылардың пікірінше, жеткізілімге қатысты қауіптің сейілуі фонында баға бір апта ішінде күрт төмендейді, өйткені бөгеліп қалған мұнай танкерлерінің көбі ілеспе күзеттің жоқтығына қарамастан Ормуз бұғазынан шығып жатыр.

Brent маркалы мұнай фьючерстері 19 центке немесе 0,25 пайызға арзандап, барреліне 75,07 доллар болды, ал американдық West Texas Intermediate мұнайы 13 центке немесе 0,18 пайызға төмендеп, барреліне 71,79 долларды құрады.

АҚШ Мемлекеттік хатшысы Марко Рубио бейсенбі күні Парсы шығанағындағы одақтастарына Иранмен жасалатын кез келген келісімде олардың мүддесі ескерілетінін мәлімдеді. Ол Таяу Шығысқа сапарын аяқтай отырып, алдын ала келісімге күмәнмен қарап отырған өңірлік серіктестердің қолдауына ие болуды көздейді.