23 тамыз 2021 | 13:54

Кабул әуежайындағы атыс кезінде ауған әскери қызметкері қаза тапты

Гүлнара Досымшалова Корреспондент

Фото ©REUTERS

Кабул әуежайындағы атыс кезінде Ауғанстан қауіпсіздік офицері қаза тапты, - деп хабарлайды Tengrinews.kz тілшісі.

Бұл туралы неміс әскери қызметкерлері Twitter-де мәлім етті. Сондай-ақ, бұл оқиғаға АҚШ пен Германия күштері қатысқаны хабарланды. Оқиға салдарынан тағы үш адам жарақат алған.

"Кабул әуежайының солтүстік қақпасында ауған қауіпсіздік күштері мен белгісіз адамдар арасында атыс болды. Ауған қауіпсіздік қызметкері қаза тауып, тағы үшеуі жараланды", - делінген хабарламада.

Heute Morgen um 04.13Uhr MESZ kam es am North Gate des Flughafens #Kabul zu einem Feuergefecht zwischen afghanischen Sicherheitskräften und unbekannten Angreifern. Eine afghanische Sicherheitskraft wurde dabei getötet, drei weitere verwundet. pic.twitter.com/4FLILE1NVA
— Bundeswehr im Einsatz (@Bw_Einsatz) August 23, 2021

Елден кетуге тырысқан мыңдаған адам әлі де әуежай айналасында жүргені айтылды.

Бұған дейін Панжердегі қарсылық отрядтарының жетекшісі Ахмад Масуд провинцияны "Талибан" билігіне беруден бас тартқаны хабарланған болатын. Оның айтуынша, көтерілісшілер тәліптерге қарсы тұруға ниетті. Масуд, егер "Талибан" халықты билікті мойындауға мәжбүрлейтін болса, онда олар ұзақ уақыт билікте қала алмайтынына сенім білдірді.

Еске салайық, 17 тамызда "Талибан" қозғалысы Ауғанстанның бүкіл аумағын бақылауға алғанын жариялаған болатын. Содырлар үкіметпен Кабулға бейбіт жолмен кіру мүмкіндігі туралы келіссөз жүргізіп жатқанын және Ауғанстан үкіметі өтпелі кезең аяқталғанға дейін Кабулдың қауіпсіздігі үшін жауап беретінін айтқан.

Кейін тәліптер Кабулдағы президент сарайын басып алғаны, ал Ауғанстан президенті Ашраф Ғани елден кеткені хабарланған болатын.

Сілтемесіз жаңалық оқисыз ба? Онда Telegram желісінде парақшамызға тіркеліңіз!

Талибан Ауғанстан тәліптер