Ресейдің Владимир облысында Покров станциясының теміржол өткелінде пойыз бен жолаушылар автобусы соқтығысып, салдарынан 17 адам қаза тапқан, - деп хабарлайды Tengrinews.kz тілшісі өңірлік ІІМБ өкілдеріне сілтеме жасап. БАҚ-тың мәліметінше, автобус Қазақстаннан барған.
"Алдын ала мәлімет бойынша, бүгін, 6 қазанда сағат 03:29-да Владимир облысында "Покров" теміржол станциясында жолаушылар автобусы теміржол бағдаршамының рұқсат етілмеген белгісіне жүріп кетіп, салдарынан пойызбен соқтығысқан. Автобус салонында болған оннан аса адам қаза тапқан", - делінген хабарламада.
Сондай-ақ, қазіргі уақытта оқиға орнында полиция қызметкерлері жұмыс істеп жатқаны айтылады. Оқиғаның мән-жайы мен қаза тапқандардың аты-жөндері анықталып жатыр.
Ал Mash паблигінің мәліметінше, автобуста Қазақстан азаматтары болған делінеді. ҚР СІМ ресми өкілі Әнуар Жайнақов өз кезегінде ведомствоның оқиғаның мән-жайын анықтап жатқанын хабарлады.
