Бельгиядағы ереуіл: Еуропада жүздеген рейс тоқтатылды

Бельгияда ұлттық ереуілге байланысты әуе кеңістігі жабылды, - деп хабарлайды Tengritravel.kz тілшісі.

AviationSourceNews мәліметінше, 2025 жылғы 13 ақпанда Бельгияның әуе кеңістігі елге кіретін және елден шығатын рейстер үшін жабылды. Ұлттық ауқымдағы ереуіл салдарынан елдегі әуе қатынасы толықтай тоқтап, ірі әуежайлардың жұмысына елеулі кедергілер келuty және көптеген рейстер тоқтатылды.

Ереуілдің себебі

Ұлттық ереуіл Бельгия үкіметі ұсынған зейнетақы жүйесін реформалау және қатаң үнемдеу шараларына қарсы ұйымдастырылған. Әуе диспетчерлері де қоса алғанда, әртүрлі сала қызметкерлері мемлекеттік саясатты қайта қарауды талап етіп, жұмысын тоқтатты.

Әуе кеңістігі қанша уақытқа жабылады

Ресми ақпаратқа сәйкес, Бельгияның әуе кеңістігі 13 ақпанда таңғы 6:45-те жабылып, Орталық Еуропа уақыты (CET) бойынша кешкі 22:15-ке дейін жабық болады.

Бұл шектеу 7500 метрден төмен биіктікте орындалатын барлық рейстерге қатысты, нәтижесінде Бельгия арқылы ұшатын әуе қатынасының басым бөлігі, оның ішінде ішкі және халықаралық рейстер тоқтайды.

Қандай әуежайларға әсер етті

Ереуіл кезеңінде елдің барлық ірі әуежайлары жұмысын тоқтатты:

• Брюссель әуежайы (Brussels Airport)
• Шарлеруа әуежайы (Charleroi Airport)
• Льеж әуежайы (Liège Airport)
• Антверпен әуежайы (Antwerp Airport)
• Остенд әуежайы (Ostend Airport)

Әуе кеңістігінің жабылуына байланысты әуекомпаниялары жүздеген рейсті тоқтатуға мәжбүр болған. 13 ақпанға рейсі жоспарланған жолаушылар әуекомпанияларына хабарласып, билет ақшасын қайтару немесе қайта брондау мүмкіндіктерін қарастыруы қажет.

Көрші елдердегі әуежайлардың дайындығы

Маастрихт-Аахен әуежайы жолаушылар ағынын қабылдауға дайындықты бастап кетті. Әуежайдың баспасөз қызметі қосымша қызметкерлер жұмылдырылып, қауіпсіздік, тазалық және тамақтану қызметтері күшейтілгенін мәлімдеді.

Жолаушылар не істеуі керек?

Егер сіздің 13 ақпанға жоспарланған рейсіңіз Бельгия арқылы болса:

• рейсіңіздің мәртебесін әуекомпанияның сайтынан тексеріңіз;
• өтемақы немесе рейсті ауыстыру мүмкіндіктерін анықтау үшін әуекомпаниямен байланысыңыз;
• көрші елдер арқылы балама бағыттарды қарастырыңыз.

Саяхат қызықтары мен пайдалы ақпаратты Instagram және Facebook парақшаларынан оқи аласыз!