“Бетон үстінде жатқан“: германиялық турист туроператорды сотта жеңді

Немис турисі Грекия қонақүйінде демалыс кезінде шезлонгқа ие бола алмағаны үшін туроператордан мың еуроға жуық өтемақы алды, деп хабарлайды Tengri Travel тілшісі The Guardian басылымына сілтеме жасап.

Ганновер соты ер адам мен оның отбасына бетон үстінде жатуға тура келгендіктен, оның өтемақы алуға құқығы бар деген шешім шығарды.

Аты-жөні жарияланбаған ер адам 2024 жылы отбасымен бірге Грекияның Кос аралында демалған. Ол күн сайын шезлонгтан орын алу үшін таң атпастан оянғанымен, бұл мақсатына жете алмағанын айтты.

Ол әйелі және екі баласымен бірге демалу үшін 7000 еуродан астам қаражат төлеген, алайда грек курортында болған уақытында бүкіл отбасы бетон үстінде жатуға мәжбүр болған.

Ер адам шағымынан кейін қонақүйден қаражаттың бір бөлігін қайтарып алған. Дегенмен, өткен айда Ганновер аймақтық соты төрт адамнан тұратын отбасының 986,70 еуро көлеміндегі үлкенірек сомаға құқығы бар екенін айтып, Германиядағы туроператорды да жауапты деп таныған.

Іс бойынша айғақ беру кезінде ер адам сотқа қонақүй де, туроператор да курорттың шезлонгқа қатысты өз ережелерінің сақталуын қамтамасыз ету үшін ешқандай шара қолданбағанын мәлімдеді.

Сот демалушыларға шезлонгтың әрқашан табыла бермейтінімен келісуге тура келсе де, туроператордың міндеті қонақүймен бірлесе отырып, шезлонгтар саны мен демалушылар саны арасындағы тепе-теңдікті орнатуға мүмкіндік беретін жүйенің болуын қамтамасыз ету екенін атап өткен.

Legal Tribune Online заң жаңалықтары сайты Германиядағы туроператордың Грекиядағы жағдайға жауапты деп танылуы пакеттік турларды ұйымдастыруды реттейтін қатаң заңдармен түсіндірілетінін хабарлады. Басылымның пікірінше, қонақүй заңды түрде қызмет көрсетуші, демек туроператордың агенті болып саналған.