"Астана ЭКСПО-2017" ҰҚ" АҚ баспасөз қызметіндегілер Vesti.kz басылымына қазақстандық боксшы Геннадий Головкин мен ұлыбританиялық Билли Джо Сондерстің кездесуіне қатысты келіссөздер жайлы айтып берді.
"Жекпе-жекке қатысты келіссөздер жүргізіліп жатыр, алайда оған қатысты басқа мәліметтерді айта алмаймыз", - деді "Астана ЭКСПО-2017" ҰҚ" АҚ баспасөз қызметіндегілер.
Еске сала кетейік, осыған дейін БАҚ-тарда Головкин мен Сондерстің жазда Қазақстанда жұдырықтасатыны хабарланған болатын. "Билли Джо Сондерс Геннадий Головкинге қарсы, жекпе-жек Қазақстанда өтеді", - делінген еді Boxing Legends TV арнасының парақшасында. Айта кетейік, GGG қазірде Сондерстің иелігіндегі WBO белбеуін алса, орта салмақтағы барлық титулдың басын біріктіреді.
Сондай-ақ, қазақстандық промоутер Головкин Астанада жекпе-жек өткізеді деген хабарға қатысты пікір білдірген еді.
