WBA тұжырымы бойынша "суперчемпион" Роуши Уоррен мен WBA белбеуінің иегері қазақстандық Жанат Жақиянов көз арбасты, - деп хабарлайды Vesti.kz сайтының қазақ бөлімі.
Америкалық және қазақстандық боксшы ертең АҚШ-тағы Толедо қаласында жұдырықтасады. Бұл жекпе-жекте 29 жастағы Уоррен жеңіл салмақта WBA (Super) және IBO тұжырымдары бойынша чемпион атағын қорғайды.
Бүгін боксшылар көз арбасып, тілшілермен сұхбаттасты.
"Бұл мен үшін аса маңызды жекпе-жек. Мен әлем "суперчемпионымын", дегенмен, әлі көп нәрсе істеуім керек. Жеңіл салмақтағы барлық белбеуді жинағым келеді. Бірінші кедергі - чемпиондық атағымды қорғау. Жақияновты жеңгеннен кейін белбеулерімді ары қарай қорғауға дайынмын", - деді баспасөз жиыны барысында Уоррен.
Айта кетейік, бұл Жақияновтың АҚШ-тағы алғашқы жекпе-жегі. Бұған дейін ол 12 елде жұдырықтасқан болатын.
