Инвестициялар және даму министрі Жеңіс Қасымбек министрлік пен Ұлттық банктің жаңа ипотекалық бағдарламаны іске асыру механизмін үкіметтің келесі отырысына дейін даярлауы керектігін айтты, - деп хабарлайды Tengrinews.kz тілшісі.
"Баспана сатып алғысы немесе оны жақсартқысы келетін азаматтарды ынталандыру керек, сондықтан премьер-министр нақты уақытты белгіледі. Біз Ұлттық банкпен бірге бір апта ішінде қалай жүзеге асыратынымыздың нақты механизмін даярлауымыз қажет", - деді Қасымбек.
Оның сөзінше, жекеменшік банктерді Тұрғын үй құрылыс жинақ банкі немесе жаңа ипотекалық компания шарттары бойынша жұмыс істеуге міндеттеу мүмкін емес.
"Жаңа компания жұмыс істейтін шарттар, кеше елбасы айтқандай, 7 пайыз. Алғашқы жарна 20 пайыз және кредит мерзімі 25 жыл. Әрине, бүгінгі күнмен салыстырғанда ТҮҚЖБ-ның өзінде бастапқы жарна 30-дан 50 пайызға дейін. Бұл азаматтарды қолжетімді баспанамен қамтамасыз етуде үлкен серпін болмақ, өйткені, 7 пайыз қазіргі нарықтағыдан екі есе төмен. Жекеменшік банктерде 30, 50 пайызға дейін барады, ал мұнда тек 20 пайыз", - деп жалғастырды министр.
Министрдің пікірінше, Елбасының бастамасы ипотекалық кредит беру нарығын, құрылыс саласын және құрылыс материалдарын өндіруді дамытуға ықпал етеді.
"Тұрғын үй құрылыс жинақ банкі - еліміздегі ипотеканың шамамен үштен екісі. Нарықта тағы бір компанияның пайда болуы бәсекелестікті арттырады. Мұнда қалың кезектер болатынын түсінеміз. Кеше Елбасы нақты соманы белгіледі - үш триллион теңге. Бұл қаржы жеткілікті деп есептеймін", - деп аяқтады министр.
Еске салайық, Қазақстан Президенті Нұрсұлтан Назарбаев көпшілік үшін баспана ипотекасын қолжетімді ететін жаңа "7-20-25" бағдарламасын ұсынған болатын.
