Алматыда арнайы операция нәтижесінде қарақшылар ұсталды, - деп хабарлайды Tengrinews.kz тілшісі Polisia.kz сайтына сілтеме жасап.
Медеу ауданы полициясының мәліметінше, кешкі тоғыз жарымда үш ер адам өтіп бара жатқан адамға шабуыл жасаған: күш қолданып, ұялы телефоны мен басқа да мүлкін тартып алған.
"Жедел шаралар кешені, соның ішінде қаланың бейнебақылау жүйелеріне мониторинг жасау арқылы тәулік ішінде қаскөйлердің жүріп өткен жолы, көлік маркасы, сондай-ақ олардың жеке басы анықталды. Бұл – 30, 19, 18 жастағы жергілікті тұрғындар. Күдіктілердің көлігі Тәттімбет көшесінде бөгелді. Шабуылшыларды ұстау бойынша арнайы іс-шара полицияның арнайы жасақтарының көмегімен жүргізілді. Көліктің ішін тінту кезінде шолақ мылтық табылды. Тәркіленген қаруға сот-баллистикалық сараптама тағайындалды. Оның шығу тегі, қандай қылмысқа қатысы бар екені осы зерттеу нәтижесінде белгілі болады", – деді Медеу аудандық Полиция басқармасының бастығы Ілияс Өмірсеріков.
Спикердің айтуынша, күдіктілер уақытша ұстау изоляторына қамалған. Тергеудің осы кезеңінде олардың кем дегенде үш тонауға қатысы бар екені анықталды.
Фото: polisia.kz
Сілтемесіз жаңалық оқисыз ба? Онда Telegram желісінде парақшамызға тіркеліңіз!