+7 (777) 001 44 99
Қазақша
Русский
English
Қазақша
Русский
English
Алматы облысы Іле ауданының 27 жастағы тұрғыны өз сәбиін сатпақ болды. Келіншек қызын өткен жылдың 19 желтоқсанында Алматыда босанған, - деп хабарлайды Tengrinews.kz тілшісі қалалық ІІД баспасөз қызметіне сілтеме жасап.
"Д деген азаматшаның өз баласын сатпақ ойы болған. Босанғалы бері жас ана өз сәбиіне ата-ана іздеген. Сатып алушы тез табылды. Анасы өз қызын 180 мың теңгеге бағалады", - делінген баспасөз қызметінің хабарламасында.
Полицейлердің айтуынша, сауда таяуда Бостандық ауданында кешкі сағат шамамен 19.00-де жасалды. "Бұл уақытта арнайы операцияның нақты жоспары болды. Айта кетейін, жедел хабарламаны біздің бөлімшенің қызметкерлері дер кезінде тексерді", - деп хабарлады Алматы қалалық ІІД ұйымдасқан қылмысқа қарсы күрес басқармасының бастығы Таңат Назанов.
Бала сатушыдан куәгерлердің көзінше 180 мың теңге тәркіленді. Келіншек өз кінәсін бірден мойындап, ақшаға материалдық жағдайын жақсартқысы келгенін айтты.
"Қылмыстық іс жүргізу заңнамасының жаңа талаптарына сәйкес, бұл дерек сотқа дейінгі тергеудің бірыңғай реестрінде тіркелді. Күдіктіден жауап алынды. Оның айтуынша, бұған дейін ол екі бала босанып, оларды перзентханада тастап кеткен. Бұның рас-өтірігі тергеуден кейін анықталады. Мұнымен қатар, тергеу аясында бұл таң қалдыратын оқиғаның нақты мотиві анықталады. Айта кетейік, бұл қылмыс заң тілінде кәмелет жасына толмағандар саудасы деп аталып, ҚР ҚК 135-бабының нормасы бойынша қарастырылады", - деді тәртіп сақшылары.
Еске сала кетейік, бұған дейін Қарағанды базарында бір әйелдің өз баласын сатпақ болғаны хабарланған еді. Полицияға хабарласқан куәгер, базарда бір әйелдің емізулі баланы сатпақ болып жүргенін айтады. Оқиға орнына жедел жетіп, әйелді құрықтаған кезде оның мас екені белгілі болған. Алайда ол баласын сатпақ болғанын мойындамаған. Өзінің қызын сатпақ болған әйелге қатысты ҚР ҚК 133-бабының 1-бөлігі - "Кәмелетке толмағандарды саудалау" бойынша қылмыстық іс қозғалған болатын.
