+7 (777) 001 44 99
Қазақша
Русский
English
Ақтауда соққыға жығылған 18 жастағы сарбаз Дәулет Әшіровтің ісіне қатысты жаңа деректер шықты, - деп хабарлайды "Лада" ҚР Қорғаныс министрлігіне сілтеме жасап.
Басылымның мәліметінше, қазіргі уақытта осы дерек бойынша бірнеше сараптама тағайындалды.
Сондай-ақ, 25744 әскери бөлімінің сарбазының Дәулет Әшіровті ұрып-соқты деген күдікке ілінгені белгілі болды.
Қорғаныс министрлігінің мәліметінше, Ақтау әскери полициясы ҚР Қылмыстық кодексінің 440-бабының 3-бөлігі 4-тармағы бойынша ("Әскери қызметшiлер арасында бағыныштылық қатынастар болмаған кезде олардың арасындағы өзара қарым-қатынастардың жарғылық қағидаларын бұзу") сотқа дейінгі тергеу бастады.
"2017 жылдың 23 қарашасында 25744 әскери бөлімінің сарбазы осы іс бойынша күдікті ретінде танылды. Қажетті тергеу шаралары жүргізілді, сараптамалар тағайындалды. Сараптамалар нәтижесінен кейін күдіктіге қатысты бұлтартпау шарасы таңдалады", - деп хабарлады министрліктегілер.
Еске сала кетейік, осыған дейін Ақтауда қатарласы соққыға жығып, басынан орындықпен ұрған сарбаздың комада жатқаны хабарланған еді. Дәулет Әшіровтің әкесінің сөзінше, ұлы осы көктемде әскер қатарына қабылданған. Кейін келісімшарт бойынша әскерде қызмет етпек болған."Өзінің шамасы келмей орындыққа жармасқан. Міне енді осылай болды. Аямаймын, соттасын. Құдайдан тілейтінім тек ұлымның амандығы. Мықты мамандар қарап, ұлымды аяғынан тұрғызып берсе екен", - деген еді сарбаздың әкесі Бақтыбек Әшіров.
