Қарағандыда автокөлік салонынан 34 жастағы әйел өлі табылды. Оның денесінде пышақ жарақаты болған, - деп хабарлайды Tengrinews.kz.
"Артында екі баласы қалды"
Төлепов көшесіндегі көліктің ішінен әйелдің мәйіті табылды. Марқұмның таныстары оның артында екі баласы қалғанын айтты. Олардың сөзінше, әйел риэлторлық қызметпен айналысқан және жақсы тұрған.
"Ол жылжымайтын мүлік саласында жұмыс істеді, табысы жақсы болды, өз күнін өзі көретін. Оны танитындардың бәрі есеңгіреп қалды", - деді танысы.
Полиция не дейді?
Қарағанды облыстық Полиция департаментінің баспасөз қызметі мәліметінше, аталған дерек бойынша "Адам өлтіру" бабымен қылмыстық іс қозғалған.
"Сотқа дейінгі тергеу амалдары жүргізіліп жатыр", - деп хабарлады Қарағанды облысы ПД баспасөз қызметі.
Жедел-іздестіру іс-шаралары барысында 35 жастағы күдікті анықталып, ұсталды. Ол уақытша ұстау изоляторына қамалды. Қылмыстың себебі әзірге белгісіз. Полицияның нақтылауы бойынша, тергеу мүддесіне байланысты өзге ақпарат жарияланбайды.
