Сәтбаевтағы қыз зорлау оқиғасы: сотта жантүршігерлік деректер айтылды

Алқабилер соты Сәтбаев қаласында жас қызды зорлау, сексуалдық сипаттағы зорлық-зомбылық әрекеттері және денсаулығына ауыр зиян келтіру туралы іс бойынша үкім шығарды, - деп хабарлайды Tengrinews.kz тілшісі Қарағанды облысының қылмыстық істер жөніндегі мамандандырылған ауданаралық сотының баспасөз қызметіне сілтеме жасап.

Ерлі-зайыптылар Пр. мен П. сотқа тартылды. Тағы бір күдікті Г. тергеу кезінде өз-өзіне қол салды. Оған қатысты іс тоқтатылып, сотта қараусыз қалды.

"2020 жылдың 23 шілдесінде Г. мас күйінде өз үйінің кіреберісінде жас қызды кездестіріп, оны ұстап алып, пәтеріне кіргізген. Содан кейін Г. көршісін шақырып, зорлық-зомбылық жасауды ұсынған, көршісі келіскен. Содан кейін олар көршісінің әйелін шақырады, ол қылмыстық ниеттерін біліп, балаға анықталмаған заты бар екпе салады. Қыз есін жоғалта бастайды. Осыдан кейін екі ер адам жас баланы зорлау және жыныстық сипаттағы зорлық-зомбылық әрекеттерін жасайды. Сараптама қорытындысына сәйкес жәбірленушінің психикалық денсаулығына ауыр зиян келтірілген", - делінген хабарламада.

Алқабилер соты айыптаудың барлық бабы бойынша Пр. мен П.-ны кінәлі деп таныды. Пр. әрекеттеріндегі ауырлататын жағдай - мас күйінде қылмыс жасау. Жеңілдететін мән-жайлар анықталған жоқ.

"Осы айтылғандар ескеріле отырып, Пр.-ға өмір бойы бас бостандығынан айыру жазасы тағайындалды. Ол жазасын төтенше қауіпсіздік мекемесінде өтейді. Бұл ретте мерзімнің алғашқы бес жылы толық қауіпсіздік мекемесінде өтелуі тиіс.

Заң бойынша әйелдерге өмір бойы бас бостандығынан айыру жазасын тағайындауға тыйым салынған (ҚК-нің 46-бабы). Осыған байланысты сотталушы П.-ға қылмыстардың жиынтығы бойынша 22 жылға бас бостандығынан айыру жазасы тағайындалды, өмір бойына педагогикалық және кәмелетке толмағандармен жұмыс істеуге байланысты лауазымдарды атқару құқығынан айырылды", - деп хабарлады соттағылар.

Үкім заңды күшіне енген жоқ.

Баланы ұрлап, зорлау оқиғасынан кейін 2020 жылдың 24 шілдесіне қараған түні Сәтбаев пен Жезқазғанның ашуланған тұрғындары зорлаушыны жазаға тарту үшін беруді талап етті. Күдіктіге полиция формасы кигізіліп, үйден шығарылған. Жұрт алаңға жиналып, жергілікті полиция бөлімінде тәртіпсіздік жасаған.

6 қазанда Қарағанды тергеу изоляторында қызды зорлады деген күдікпен ұсталған адам өлі табылды. Өлім себебі - суицид.

Кейін тәртіпсіздік жасау туралы іс бойынша 55 адам сот алдына келді, оның ішінде кәмелетке толмағандар да болды. Оларға 272-баптың 1, 2-бөліктері "Жаппай тәртіпсіздіктерді ұйымдастыру және оған қатысу" және 380-баптың 1-бөлігі "Билік өкіліне қатысты зорлық-зомбылық қолдану" бойынша айып тағылды. Барлық сотталушы прокурорлармен процессуалдық келісім жасасып, кінәсін мойындады. Мамыр айында Қарағандыдағы сот оларға үкім шығарды.

Сілтемесіз жаңалық оқисыз ба? Онда "ВКонтакте" желісінде парақшамызға тіркеліңіз!