Таразда үш адамды қағып кеткен жүргізуші ұсталды, - деп хабарлайды Tengrinews.kz тілшісі Жамбыл облысы ІІД баспасөз қызметіне сілтеме жасап.
Полицейлердің айтуынша, бұл дерек бойынша "102" пультіне хабар түспеген. "Жедел іздестіру шараларының нәтижесінде кінәлі адам анықталды. Ол Тараздың 1993 жылғы тұрғыны болып шықты. Ұсталған адам кінәсін мойындады", - деді полицейлер.
Еске салайық, жол-көлік оқиғасы 4 мамыр күні сағат 03.30-да болған еді. Дегенмен видео кеше ғана жарияланып отыр. Кадрда жеңіл автомобильдің көше ортасында "дрифт" жасағаны бейнеленген. Куәгерлердің кейбірі BMW жүргізушісін тоқтатпақ болады. Дегенмен жүргізуші үш адамды қағып кетті.
