Алматыдағы "Таугүл-1" шағынауданында жол талғамайтын көлік балабақша алдындағы балалар алаңына барып соғылды, - деп хабарлайды Tengrinews.kz тілшісі. 5 жасар бүлдіршін қаза болды.
Куәгерлердің айтуынша, қара түсті Toyota Land Cruiser автомобилі балалар алаңына барып соғылды. Оқиға кезінде балалар алаңында 26 бала ойнап отырған. Салдарынан 1 бүлдіршін қаза болды, тағы сегізі жарақат алды. Зардап шеккендер бас және дене жарақаттарымен ауруханаға әкетілді. Абдырап қалған ата-аналар өз балаларын оқиға орнынан шұғыл түрде алып кетіп жатыр. Тәрбиешілердің айтуынша, оқиға бір мезетте болды, қатты соққы болып, автокөлік балалар алаңынан бірақ шықты.
Оқиға орнында жедел жәрдемнің 3 бригадасы, құқыққорғаушылар жұмыс істеп жатыр. Балабақшаға баратын жол қоршауға алынды. Куәгерлердің айтуынша, автомобиль тізгінінде әйел адам болған. Ата-аналар жол талғамайтын көліктің жүргізушісін көрсетуді талап етіп жатыр.
