+7 (777) 001 44 99
Қазақша
Русский
English
Жамбыл облысында Ан-2 ұшағы тұманнан апатқа ұшыраған болуы мүмкін, - деп хабарлайды Tengrinews.kz тілшісі ҚР ТЖД Төтенше жағдайлар комитетінің баспасөз қызметіне сілтеме жасап.
Алдын ала мәліметтер бойынша, ұшақ тұманның салдарынан болған көру мүмкіндігінің нашарлығы жағдайында қонуға әрекет жасап, жерге құлаған. Апат болған жерде Қарағанды және Жамбыл облыстарынан Төтенше жағдайлар жөніндегі департаменттердің құтқару бөлімшелерінің қызметкерлері, "Қазақмыс" корпорациясы" ЖШС қауіпсіздік қызметінің қызметкерлері жұмыс жасап жатыр. "Ұшақ апатының тергеу жұмыстарымен Жамбыл облысы ІІД жедел-тергеу тобы айналысып жатыр", - деп хабарлады баспасөз қызметінің өкілдері.
Балқаш - Шатыркөл бағыты бойынша ұшып бара жатқан Ан-2 ұшағы 20 қаңтарда сағат 15.40-та Жамбыл облысындағы "Шатыркөл" кен орны маңында құлаған болатын. "Қазақмыс" корпорациясы" ЖШС "Шатыркөл" кен орнының күшімен жүргізілген іздестіру-құтқару жұмыстарының нәтижесінде сағат 17.01-де құлаған ұшақ кен орнынан 20 шақырым жерде табылды. Ұшақта болғандардың төртеуі "Қазақмыс" корпорациясы қызметкері екені хабарланды. Ұшақтың құлауынан экипаждың 3 мүшесі, сондай-ақ 3 жолаушы қаза болды. Ұшақ құлаған орында тірі қалған бір әйел адам табылды, ол ауруханаға жеткізілді. 1986 жылы туған зардап шегуші жансақтау бөлімінде жатыр, оның бірнеше жерден сүйегі сынған, миы шайқалған.
