28 шілде күні Bek Air әуе компаниясының ұшағы (Fokker-100, рейс БЕК-2106) борттың электр жүйесіндегі ақауға байланысты Атыраудан Алматыға ұша алмай қалды, - деп хабарлайды Tengrinews.kz тілшісі Атырау облыстық төтенше жағдайлар департаментінің баспасөз қызметіне сілтеме жасап.
"Атырау әуежайында ұшақ ұшу жолағымен 350 метр жүріп, ұшуды тоқтатты. Тоқтаудың себебі - FMS жүйесінің келісілмеуі (тұрақты ток бойынша сақтандырғыш құрал істен шықты), соның салдарынан ұшақтың электр жүйесінде ақау пайда болды", - деп хабарлады департамент мамандары.
Ұшақ бортында 110 жолаушы мен экипаждың бес мүшесі болған. Зардап шеккендер жоқ. "Ұшақтан түсірілген жолаушылар Атырау әуежайына орналастырылды. Оқиғаны "Атырау халықаралық әуежайы" АҚ комиссиясы тексеріп жатыр", - дейді баспасөз қызметі.
