Қостанайда жеке тұрғын үйде болған өрттен 7 жасар қыз қаза тапты, - деп хабарлайды Tengrinews.kz тілшісі.
Қостанайда жеке секторда өрт шығып, 6 пәтерлі үйдің қабырғалары мен төбесі өртенді. Өрт сөндіру қызметі сағат 17:20-да шақырылды. Құтқарушылар төрт адамды өрттен алып шықты.
"Жалпы, 50 шаршы метр аумақ өртенген. 4 тұрғын эвакуацияланды. Жедел жәрдем дәрігерлері шұғыл көмек көрсетті. Қалалық ауруханаға 1977 жылы туған пәтер иесі жеткізілді. Денесінің 80-88 пайызын ІІІ дәрежелі күйік шалған. Халі мүшкіл, жансақтау бөлімінде жатыр. Оның 46 жастағы күйеуінің беті мен қолы күйген. Осы отбасының жеті жастағы қызы жедел жәрдем көлігінде ауруханаға жетпей көз жұмды", – деп хабарлады Қостанай облысы ТЖ Департаментінің баспасөз қызметі.
Құтқару операциясы кезінде қонаққа келген 8 жастағы бала да құтқарылды.
Өрттің шығу себебі әлі анықталған жоқ, оқиға орнында өртке қарсы ғылыми-зерттеу зертханасының мамандары жұмыс істеп жатыр. Өрт 18 сағат 23 минутта ауыздықталды. Өртті сөндіруге жеке құрамның 26 адамы мен 7 техникасы жұмылдырылды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
