ОҚО-да кәмелетке толмаған жүгізуші жол көлік оқиғасына себепкер болды, - деп хабарлайды Tengrinews.kz тілшісі.
Мұның алдында оқиғаның видеосын оқырмандар редакцияға жолдаған болатын. Видеода мемлекеттік нөмірлері шешілген полиция көлігі мен жүк көлігі соқтысып тұрған сияқты көрінеді. ІІД мәліметі бойынша, Оқиға ОҚО-ның Сарыағаш ауданында болған. Кейін ЖКО-ға жасөспірім себепкер болғаны анықталды.
Патрульдік полиция көлігі тап болған ЖКО-ға қатысты облыстық ІІД-нің баспасөз қызметі пікір білдірді.
"Ата-анасының Hyundai Starex көлігін рұқсатсыз айдап шыққан. Жолға шығып кетіп, тізгінге ие бола алмай қалған. Жүк көлігіне және полиция көлігіне соқтығысты", - дейді ОҚО ІІД-нің баспасөз қызметінің өкілері.
Қазір Сарыағаш полицейлері сотқа дейінгі тергеу жүргізіп жатыр. Жасөспірімнің ата-анасы келген шығынды өтеуге міндеттелуі мүмкін.