Ғалымдар жүрек жұмысын жақсарту үшін шайды қалай ішу керек екенін айтты

Қытай ауыл шаруашылығы ғылымдары академиясы Шай шаруашылығы институтының зерттеушілері жүздеген клиникалық және эпидемиологиялық зерттеулердің нәтижелерін жинақтай отырып, көкшайдың адам денсаулығына әсері туралы деректерге ауқымды шолу жасады, деп хабарлайды Tengri Life тілшісі Газета.Ru басылымына сілтеме жасап.

Авторлар қорғаныс әсерінің бес негізгі бағытын атап өтті:

• липидтік профильді жақсарту және артериялық қысымды төмендету арқылы жүрек-қантамыр ауруларының қаупін азайту;
• инсулинге сезімталдықты қалыпқа келтіру арқылы екінші типті диабеттің алдын алу;
• ісік жасушаларының пролиферациясын тежеуге байланысты антионкогендік әсер;
• қартаю кезіндегі когнитивті функцияларды қорғау;
• сондай-ақ саркопенияға - бұлшықет массасының жасқа байланысты жоғалуына қарсы тұру.

Негізгі биологиялық белсенді топ ретінде катехиндер танылды - бұл созылмалы қабынуды басатын, қандағы глюкоза деңгейін қалыпқа келтіретін және нейрондарды тотығу стресінен қорғайтын өсімдік полифенолдары.

Анықталғандай, шайға сүт қосу казеинмен байланысуына байланысты катехиндердің биожетімділігін шамамен үштен біріне төмендетеді.

Шолу авторлары барынша алдын алу әсері үшін күніне үштен бес кесеге дейін көкшай ішуді ұсынады. Бұл ретте шайды Цельсий бойынша 80 градустан аспайтын температурада демдеу керек: қайнаған су катехиндердің бір бөлігін бұзады және ұзақ уақыт жүйелі түрде тұтынған жағдайда өңештің шырышты қабығының жеңіл тітіркенуіне әкеп соқтыруы мүмкін.

Зерттеу қарашайды да қамтыды, ол теафлавиндердің арқасында антиоксиданттық қасиеттерге ие, дегенмен бұл қасиет көк шайға қарағанда төменірек.

Сонымен қатар, ғалымдар табиғи демделген шай мен өндірістік бөтелкедегі сусындар немесе "bubble tea" деп аталатын сусындар арасындағы түбегейлі айырмашылыққа ерекше назар аударды. Соңғыларында термиялық өңдеу және ұзақ сақтау салдарынан катехиндердің концентрациясы күрт төмендейді, ал қосылған қант шайдың метаболикалық артықшылықтарын ішінара немесе толығымен жояды.