1. Басты
  2. Біл
  3. Жаңалықтар
  4. Ел жаңалықтары

7 мыңға жуық қазақстандық карантинде жатыр

Денсаулық сақтау министрлігі коронавирусқа байланысты елімізде қанша адамның карантинде жатқанына қатысты мәліметті жариялады, - деп хабарлайды Tengrinews.kz тілшісі.

Министрліктің мәліметі бойынша, бүгінде 6 963 қазақстандық карантинде жатыр. Оның 2 164-і стационарлық, ал 4 799-ы үй карантинінде.

Соңғы мәліметтер бойынша, елімізде коронавирус жұқтарғандардың саны 97-ге жетті.

"Нұр-Сұлтан қаласы бойынша 55 адам, Алматы қаласында - 34 адам,  Қарағанды қаласында – 2 адам, Шымкент қаласында - 2 адам, Алматы облысында - 1 адам, Ақтөбе облысында - 1 адам, Жамбыл облысында -1 адам, Солтүстік Қазақстан облысында - 1 адам", - делінген денсаулық сақтау министрлігінің баспасөз қызметі таратқан хабарламада.

Екі күннің ішінде қауіпті індетті жұқтырғандардың саны 25-ке өскен Осылайша, стационарлық каратинде жатқандар 459-ға, үй карантиндегілер 1806 адамға артты.

Осыған дейін Қазақстанда екі науқастың коронавирустан жазылғанын хабарлағанбыз. Олар бүгін ауруханадан шығарылады.

Айта кетейік, 16 наурыздан бастап, елімізде төтенше жағдай жарияланды. Ал 19 наурызда Нұр-Сұлтан мен Алматы қалалары карантинге жабылды.