Еліміздің басым бөлігінде жауын-шашын күтіледі. Сондай-ақ, жеті облыста ауа температурасы төмендейді деп болжанып отыр, - деп хабарлайды Tengrinews.kz тілшісі. Бұл туралы "Қазгидромет" республикалық-мемлекеттік кәсіпорнының директоры Марина Шмидт айтты.
"Алдын ала болжам бойынша, 21-24 сәуір аралығында белсенді циклондар мен олардың атмосфералық фронттарына байланысты еліміздің басым бөлігінде жауын-шашын болады. БҚО, СҚО, Қостанай, Қарағанды, Ақтөбе, Алматы және Жамбыл облыстарынада қатты жауын-шашын мен ауа температурасының төмендеуі күтіледі", - деді Марина Шмидт.
Синоптиктердің мәліметінше, Қазақстанның батысында түнде ауа температурасы -3...+2 градусқа дейін, күндіз +10...+15 градусқа дейін, еліміздің орталығы мен шығысында түнгі уақыттағы ауа температурасы -3...+2 градусқа дейін, ал күндіз +5...+13 градусқа дейін төмендейді. Ал оңтүстік пен оңтүстік-шығыста түнде ауа температурасы +3...+8 градус, күндіз +18...+23 градус болады.
"Ал кейінірек күн қайта жылынып, еліміздің солтүстігінде ауа температурасы +18...+23 градус, оңтүстікте +20...+28 градусқа дейін жылынады. Бірақ бұл жылу ұзаққа созылмайды. Тағы бір циклонның келуіне байланысты айдың соңында республиканың барлық аумағында қайтадан жауын-шашын жауып, ауа температурасы төмендейді", - деді Марина Шмидт.
