+7 (777) 001 44 99
ПОДЕЛИТЬСЯ
Мекемелердің басым бөлігі қызметкерлеріне жалақыны уақытында бермей зар қақсатқан. Жыл басынан Мемлекеттік еңбек инспекциясы және көші-қон басқармасына 2 мыңға жуық азамат шағымданыпты. Соның 400-ге жуығы жалақысын әлі ала алмай жүр екен, - деп хабарлайды "Алматы" телеарнасы.
Мекемелердің басым бөлігі қызметкерлеріне жалақыны уақытында бермей зар қақсатқан. Жыл басынан Мемлекеттік еңбек инспекциясы және көші-қон басқармасына 2 мыңға жуық азамат шағымданыпты. Соның 400-ге жуығы жалақысын әлі ала алмай жүр екен, - деп хабарлайды "Алматы" телеарнасы.
Жанна Исабаева өзі қызмет еткен мекеменің басшылығымен арадағы келіспеушілік жұмысқа кірген уақытынан басталғанын айтады. Еңбек шартында көрсетілген жалақы сол бірінші айдан бастап толық төленбепті. Барлығын жинақтап қайтарамын деген жұмыс берушінің қарызы нәтижесінде, бір миллион теңгеге жуықтаған.
"Мен қоғамдық тамақтану орнында басқарушы директор болып қызмет еттім. Бір еңбек шартында жалақы 285 мың теңге деп көрсетілсе, екіншісінде 370 мың теңге деп жазылған. Ал түптеп келгенде, мен ондай айлықты қолыма алған емеспін. Мен 15 мамырда жұмыстан шығып кеттім. Осы уақытқа дейін оның нақты есебін ала алмай жүрмін. Өтемақы да төленбеді. Менің талабымды жұмыс беруші елемей отыр", - дейді Жанна Исабаева.
Қоғамдық тамақтану орнынан маңдай тер, адал ақысын ала алмай жүрген жалғыз Жанна емес. Өзге жұмысшылар да сотқа жүгінбекші.
Өткен жеті айда қалалық Мемлекеттік еңбек инспекциясы және көші-қон басқармасына 1950 азамат жүгінген. Соның ішінде, тұрғындардың 70 пайызы жалақыларын уақытылы алмағанын айтқан. Қалғаны жұмыстан заңсыз шығаруға қатысты шағымдар. Мамандардың сөзінше, бұған дейін еңбекақыны төлемеу бойынша құрылыс саласы көш бастаса, қазір күзет қызметі алда тұр.
"Көбінесе басқармаға еңбекақыны төлемеу бойынша жұмысшы жұмыс беруші тарапынан еңбек шарттарын жасамағаны үшін, сонымен қатар, жұмыстан босатылған кезден кейін төленуі тиіс өтемақының төленбеуі бойынша көп арыз түседі. Және азаматтардан жыл сайын берілетін еңбек демалысының уақытылы берілмегені туралы арыз-шағымдары басқармаға әрдайым түсіп тұрады", - деді Алматы қаласы Мемлекеттік еңбек инспекциясы және көші-қон басқармасының мемлекеттік еңбек инспекторы Арай Исмагулова.
Алматы қаласы Мемлекеттік еңбек инспекциясы және көші-қон басқармасы соңғы жеті айда 380 мекемеге тексеру жүргізген. Соның ішінде, кәсіпорындарда 460 заңбұзушылық анықталған. Еңбек заңнамасын сақтамаған 165 заңды тұлға әкімшілік жауапкершілікке тартылып, 32 миллион теңге айыппұл төлеген. Жүргізілген іс-шаралардың нәтижесінде 236 мекемеден 216 миллион теңге өндірілді. Осылайша 1500-ге жуық жұмысшы маңдай терімен тапқан табысын қалтасына түсірді.
