Қорғаныс министрінің орынбасары Асқар Мұстабеков биыл 7 және 9 мамырда әсери шерудің орнына қандай іс-шаралар жоспарланып жатқанын айтты. Биыл әскери шеру өткізілмейді, - деп хабарлайды Tengrinews.kz.
Министр орынбасарының айтуынша, Қорғаныс министрлігі мерекелік іс-шараларды өткізуге қаражат бөлмейді. Бұл жұмыспен әкімдіктер айналысады.
"Биыл әскери шеру жоспарланбаған, бірақ 7-9 мамыр күндері түрлі қалаларда, облыстар мен аудан орталықтарында бірқатар іс-шаралар жоспарланған. Бұл - плац-концерттер, қару-жарақ пен әскери техника көрсетілімі, Ұлы Отан соғысы ардагерлерін шақыра отырып, солдат ботқасын дайындауға арналған шатырлар құру сияқты шаралар", - деді Мұстабеков Сенатта өткен брифингте.
Қорғаныс министрлігі 7 және 9 мамырға арналған барлық мерекелік іс-шараның толығырақ анонсын кейінірек ұсынуға уәде берді.
Еске сала кетейік: былтыр Астанада Отан қорғаушы күні мен Ұлы Отан соғысындағы Жеңістің 80 жылдығына орай ауқымды әскери шеру өткен болатын.
Шеруге төрт мыңнан аса әскери қызметші, 200-ден астам әскери техника бірлігі, сондай-ақ майдандық, армиялық және әскери-көліктік авиацияның 66 ұшағы мен тікұшағы қатысты.
