Есіл ауданының тұрғындарымен кездесу барысында Астана әкімі Жеңіс Қасымбек биыл қалада үлестік құрылыстың барлық проблемалық нысандары тапсырылуы тиіс екенін мәлімдеді, - деп хабарлайды Tengrinews.kz тілшісі.
"Биыл үлестік құрылыс нысандарының барлығын тапсыруға міндеттіміз. Бірақ олар қабылдайтындай күйде болуы керек", - деді әкім елорда тұрғындарының сауалына жауап бере отырып.
Әкімдік мәліметінше, әңгіме биылғы жылы шешімін табуы жоспарланған 30-дан аса тұрғын үй кешені туралы болып отыр. Жалпы, 2019 жылдың жазынан бері елордада 150-ден аса тұрғын үй кешенінің 120-сы пайдалануға берілді.
"Бұл проблемалық үйлер бірінші жыл емес, 10-15 жыл бойы салынып жатыр. Қазір апта сайын баруым керек, өйткені жаңа мәселелер анықталып жатыр. Сондықтан, сіздермен жұмысты жалғастырамыз", - деп уәде берді Жеңіс Қасымбек.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
