Алдағы күндері Ақмола облысындағы Жабай және Қалқұтан өзендерінің суы көтеріледі деген болжам бар, - деп хабарлайды Tengrinews.kz тілшісі "Қазгидромет" мемлекеттік кәсіпорнына сілтеме жасап.
"Сәуірдің 10-13-і күндері Атбасар қаласы маңындағы Жабай, Қалқұтан аулына жақын Қалқұтан өзендерінің деңгейі көтеріледі. Өзен тасып, су басу қаупі сақталады", - делінген "Қазгидрометтің" хабарламасында.
Айта кетейік, бұған дейін сәуірдің 7-8-і күндері Атбасар және Жақсы аудандары тұрғындарының үйлерін еріген қардың суы басты. Атбасарда 120 үйге су кіріп, 150 адам қауіпсіз жерге көшірілді. Сол кезде қалаға жақын Жабай өзенінің суы 6 метрге көтерілген болатын.
