Бурабайда квадроцикл аударылып, Астананың 22 жастағы тұрғыны қаза тапты, деп хабарлайды Tengrinews.kz тілшісі sinegor.kz сайтына сілтеме жасап.
Адам өліміне әкелген жол-көлік оқиғасы 7 шілдеде Зеленый Бор және Бурабай кенттерінің арасындағы жолда болды. Алдын ала ақпарат бойынша, квадроцикл мінген бойжеткен басқаруға ие бола алмай, техника аударылып кеткен. Алған жарақаттарынан ол оқиға орнында көз жұмды.
Квадроцикл жолаушысы – елорданың 19 жастағы тұрғыны жарақат алып, медициналық көмекке жүгінді.
Қайғылы оқиға дерегі бойынша қылмыстық іс қозғалды. Полицейлер болған жағдайдың барлық мән-жайын анықтап жатыр. Сонымен қатар квадроцикл жалдау пунктінің жұмысы тексеріліп жатыр: техниканы жалға беру кезінде қауіпсіздік талаптарының сақталуы және мұның ажалды апатқа себеп болу-болмауы анықталады.