Дикий Арман ісі: сот адвокаттың өтінішіне жауап берді

Алматыдағы тергеу изоляторында Дикий Арман, Қайрат Құдайберген және тағы 30-ға жуық адамның ісі бойынша сот отырысы басталды, - деп хабарлайды Tengrinews.kz тілшісі.

2023 жылы 14 қыркүйекте даулы іс бойынша алдын ала отырыс өтті. Алматы сотының баспасөз қызметі мәлімдеме жасады. Соттың ресми парақшасында адвокаттардың атышулы қылмыстық іс бойынша процеске жіберілмеуі туралы ақпарат пайда болды.

"Процестің барлық қатысушысына №72 мекеме ғимаратына кіру және өту орны, бағыты туралы алдын ала хабарлама жіберілді. Бірқатар адам сотталушыларды әкелетін қызметтік кіреберістен өтуге тырысты. Оларға мекеменің негізгі бақылау-өткізу пункті арқылы кіру сызбасы қосымша түсіндірілді. Отырыс ашық режимде өтетіндіктен, ноутбук, планшет және басқа құрылғыларды пайдалануға тыйым салынбаған. Құрылғыларды пайдалануда техникалық мәселе туындауы мүмкін, өйткені тергеу изоляторында ұялы байланыс шектелген. № 72 мекеменің ғимараты ерекше қорғалатын нысан болғандықтан, аумаққа кіру кезінде жеке басын куәландыратын құжат тексеріледі", - делінген Алматы сотының хабарламасында.

Айта кетейік, Жұмагелдиев пен Құдайберген ісі бойынша алдын ала отырыс ІІМ ҚАЖК №72 мекемесіне өтеді.

Еске салайық, былтырғы жаппай тәртіпсіздік газға байланысты мәселеден шыққан еді. 2 қаңтарда Жаңаөзенде жиналған жұрт сұйытылған газ бағасын төмендетуді талап етті. Кейін басқа қалалар да осы үнге қосыла бастады. Соның қатарында Алматы, Нұр-Сұлтан, Ақтөбе, Орал тұрғындары да болды. Осылайша, 4 қаңтарда Қазақстанның түкпір-түкпірінде наразылық акциялары өтті. Сондай-ақ, жаппай тәртіпсіздікке ұласқан оқиға салдарынан интернетте де ақау шықты.

Ал Бас прокуратурада Алматыда өткен жаппай тәртіпсіздік хронологиясын жасаған еді. Сол мәліметтерге сүйенсек, 4 қаңтарда сағат 18.00-ден 20.00-ге дейін "Алматы - Арена" спорт кешені мен "Халық-Арена" стадионы маңында жұрт жиналған. Сағат 21.00-де жиналған адамдар қала әкімдігіне қарай қозғала бастаған. Осылайша, олар Абай, Төле би көшелерімен жүріп келе жатып, адам қосып отырған. Тәртіпсіздікке қатысушылар 5 қаңтарда Әуезов ауданының Полиция басқармасының, Алмалы ауданының Полиция басқармасы мен бөлімінің әкімшілік ғимараттарын басып алуға тырысқан. Ал кешке қарулы шабуылшылар қаланың Полиция департаментінің ғимаратына шабуыл жасаған. Әкімдік пен Президент резиденциясына шабуыл кезінде қылмыскерлер атыс қаруын қолданудың қаупін түсінгенімен, ғимараттарға мақсатты түрде шабуыл жасаған.

Ал қаңтар оқиғасынан кейін тұрғындардың талабы орындалып, өңірлерде сұйытылған газ бағасы 50 теңгеге түсті. Сондай-ақ, Ұлттық қауіпсіздік комитетінің басшысы болған Кәрім Мәсімов пен оның орынбасарлары ұсталды. Өңірлерде әлі күнге қаңтар оқиғасына қатысты істер жүргізіліп жатыр. 2 қарашада Мемлекет басшысы Қасым-Жомарт Тоқаев қаңтар оқиғасына қатысушыларға бір реттік рақымшылық жасау туралы заңға қол қойған. Бұл бойынша 1500-ға жуық адамға рақымшылық жасалатыны белгілі болды.

Сілтемесіз жаңалық оқисыз ба? Онда Telegram желісінде парақшамызға тіркеліңіз!