Еліміздің бірқатар өңірінде қалың қар жауып, боран соғады - Қазгидромет 14 қаңтар 2018, 17:30
Ертең, 15 қаңтарда Қазақстанның бірқатар өңірінде қалың қар жауып, боран соғады, - деп хабарлайды Tengrinews.kz тілшісі "Қазгидромет" орталығына сілтеме жасап.
Синоптиктердің мәліметтері бойынша, атмосфералық фронттардың өтуіне байланысты Қазақстан территориясының кей жерлерінде қар жауып, республиканың оңтүстігінде және оңтүстік-шығысында түнде кей жерлерінде қалың қар жауады. Кей жерлерінде бұрқасын, тұман, көктайғақ болып, желдің күшеюі күтіледі.
"Жамбыл, Оңтүстік Қазақстан, Солтүстік Қазақстан облыстарының кей жерлерінде желдің жылдамдығы секундына 15-20 метрге дейін жетеді, бұрқасын, тұман күтіледі, Жамбыл, Оңтүстік Қазақстан облыстарында көктайғақ болады", - делінген хабарламада.
Сонымен қатар, Алматы облысының кей жерлеріне тұман түседі, Жалаңашкөл ауданында жел күшейеді - секундына 15-20 метр.
"Ақмола, Қызылорда облыстарының кей жерлерінде тұман, желдің жылдамдығы секундына 15-20 метрге дейін жетеді деп күтіліп отыр. Ал, Батыс Қазақстан, Атырау, Ақтөбе, Қостанай, Павлодар, Шығыс Қазақстан, Қарағанды, Маңғыстау облыстарының кей жерлерінде тұман күтіледі, Павлодар облысының кей жерлерінде күндіз бұрқасын болады", - деп хабарлады метеорологтар.
- ПОДЕЛИТЬСЯ