Нұр-Сұлтан әкімдігі халықты дәрі-дәрмекпен қамтамасыз ету үшін уақтылы шаралар қабылдап жатыр, - деп хабарлайды елорда әкімдігінің ресми сайты.
Әкімдік қаладағы дәріханаларда вирусқа қарсы дәрі-дәрмектердің болуын үнемі қадағалап отырады. Елордада коронавирус жұқтыру дерегінің көбеюіне байланысты және инфекциялық аурулардың алдын-алу үшін қажетті дәрі-дәрмектермен қамтамасыз етуге ерекше назар аударылады.
"Елордалық дәріханаларда тұрғындарға қажетті барлық дәрі-дәрмек болуы керек. Дәрі-дәрмектердің негізгі ассортиментінің болуын бақылау қажет. Дәріханаларға дәрі-дәрмектерді уақтылы және жеткілікті мөлшерде сатып алу керек", - деді Нұр-Сұлтан әкімінің орынбасары Бақтияр Мәкен дәріхана желілері басшыларымен онлайн-кездесуде.
"Біз көтерме дәріхана ұйымдарына және Нұр-Сұлтан қаласының дәріханалық ұйымдарына дәрі-дәрмектер мен медициналық мақсаттағы бұйымдарды үздіксіз жеткізуді ұйымдастыруды тапсырамыз", – деп атап өтті Мәкен.
"Нұр-Сұлтан қаласы фармацевтикалық қауымдастығының" директоры Гүлнарай Алмурзинаның айтуынша, қалада кейбір дәрі-дәрмектертің тапшылығы байқалады.
"Өткен аптадан бастап қала тұрғындары вирусқа қарсы препараттар, азитромицин антибиотиктерін сатып алды. Біз анализ жүргізіп, дәрі-дәрмектердің 41 атауы көрсетілген кесте құрдық. Мемлекеттік агенттіктің дәрі-дәрмектерді халыққа қанша мөлшерде таратуға болатындығы туралы меморандумға қол қоюға шешім қабылданды. Ал антибиотиктер мен рецепт бойынша дәрі-дәрмектер, бұрынғыдай, дәрігердің нұсқауымен ғана жіберіледі", - деді Алмурзина.
Сонымен қатар, ол дене қызуын түсіретін дәрі-дәрмектердің жетіспеушілігін ескере отырып, олардың балама нұсқалары дәріханаларда "Панадол", "Эфералган", "Ибупрофен", "Ибуфен", "Миг", "Новиган" бар екенін атап өтті.
Айта кетейік, елордада коронавирус жұқтырудың 3484 дерегі тіркелді. Оның ішінде 2 501 науқас жазылды, 38 адам қайтыс болды.
