Сенат мемлекеттік қызмет туралы заң мен оған ілеспе түзетулерді мақұлдады. Құжат қазақстандық мемлекеттік қызметшілер үшін көлденең мансаптық өсу тетігін енгізеді, деп хабарлайды тілші.Tengrinews.kz.
Сенатор Евгений Больгерттің айтуынша, заң мемлекеттік қызметтің тартымдылығын айтарлықтай арттыруға және кәсіби мамандарды тұрақтандыруға бағытталған шаралар кешенін қарастырады.
"Атап айтқанда, бір лауазым шеңберінде көлденең мансаптық өсу тетігі енгізіледі. Еңбекақы деңгейі әртүрлі төрт лауазымдық деңгей белгіленеді, ал ілгерілеу қызметті бағалау нәтижелеріне, оқу мен тағылымдамаға байланысты болады. Сондай-ақ мемлекеттік қызметшілердің жалақысын үш жылда кемінде бір рет міндетті түрде индекстеу бекітіледі", - деді Больгерт.
Мемлекеттік қызмет істері агенттігі төрағасының орынбасары Салауат Мүксімов мансаптық өсудің көлденең моделі көптеген дамыған елде қолданылатынын атап өтті.
"Шын мәнінде, біз қазір осындай тәжірибеге қайта оралып жатырмыз. Бұл мемлекеттік қызметшілердің тек лауазым бойынша жоғарылап қана қоймай, бос жоғары лауазымның бар-жоғына қарамастан, бір лауазым ішінде дами алатынын білдіреді. Қызметкер өз лауазымының деңгейіне сәйкес жоғарырақ жалақы ала алады", - деп түсіндірді ол.
Бұл ретте келесі деңгейді беру туралы шешімнің объективті болуы және адам факторына тәуелді болмауы маңызды. Сондықтан бір деңгейден екіншісіне ауысу процесі "Е-қызмет" жүйесінде толық автоматтандырылады.
Лауазымдардың төрт деңгейін енгізу жоспарланған: төртіншісі - базалық деңгей. Мүксімовтің айтуынша, үшінші және екінші деңгейлерге өту үшін өз лауазымында үш жыл жұмыс істеу керек. Сондай-ақ тиімділікті бағалаудың оң нәтижелері, тәртіптік жазалардың (әсіресе әдепті бұзумен және мемлекеттік қызметтің беделін түсірумен байланысты) болмауы қажет. Бұдан бөлек, қажетті оқудан және тағылымдамадан өту міндетті шарт болады.
Әзірлеушілер көлденең мансап сатысымен ілгерілеу цифрлық форматта, адам факторының қатысуынсыз автоматты түрде жүзеге асатынына уәде береді. Бұл процестің ашықтығы мен бақылауды қамтамасыз етеді.
Мемлекеттік қызметті тағы қандай өзгерістер күтіп тұр?
Басқа да маңызды жаңашылдықтардың қатарында - мемлекеттік қызметшілерді басқа елді мекенге ауыстырған кездегі төлемдер, соның ішінде көтерме жәрдемақы мен көшу шығындарын өтеу бар.
"Кемінде 25 жыл еңбек өтілі бар және мемлекеттік немесе ведомстволық наградалары бар қызметкерлер үшін зейнетке шыққан кезде біржолғы сыйақы (төрт лауазымдық жалақы мөлшерінде) қарастырылған", - деп толықтырды Евгений Больгерт.
Мемлекеттік қызмет өтіліне байланысты қосымша ақылы демалыс күндері енгізіледі: 10 жылдан астам өтіл үшін - үш күн, 15 жылдан астам - бес күн және 20 жылдан астам - он күн. Отбасы жағдайына байланысты 10 күнтізбелік күнге дейін қысқа мерзімді ақылы демалыстар қарастырылған.
"Қызметінен заңсыз босатылған немесе лауазымы төмендетілген жағдайда қызметіне қайта орналасқан мемлекеттік қызметшілерге алты айдан аспайтын мерзімге жалақы мөлшерінде немесе жалақы айырмашылығы түрінде кепілдіктер мен өтемақы төлемдерін белгілеу", - деді сенатор.
Заң тәртіптік жауапкершілік жүйесін жетілдіреді: жеңілдететін және ауырлататын мән-жайларды ескере отырып, икемді тәсілдер енгізіледі, жауапкершілікті жоққа шығаратын жағдайлар анықталады, сондай-ақ жазалардың қолданылу мерзімдері (2 айдан 6 айға дейін) белгіленеді.
Бұдан бөлек, ескертулер, әңгімелесулер және құзыреттерді тексеру сияқты профилактикалық ықпал ету шаралары енгізіледі. Мемлекеттік қызметшілерді кәсіби қызметке заңсыз араласудан қорғау кепілдіктері күшейтіледі.
