+7 (777) 001 44 99
ПОДЕЛИТЬСЯ
Қазақстанда қосылған құн салығын (ҚҚС) төрт пайызға арттыру инфляцияның жоспарланған дәлізден ауытқуына әкелмейді. Бұл туралы Ұлттық экономика министрлігі мәлімдеме жасады, - деп хабарлайды Tengrinews.kz тілшісі.
Қазақстанда қосылған құн салығын (ҚҚС) төрт пайызға арттыру инфляцияның жоспарланған дәлізден ауытқуына әкелмейді. Бұл туралы Ұлттық экономика министрлігі мәлімдеме жасады, - деп хабарлайды Tengrinews.kz тілшісі.
ҚР Ұлттық экономика вице-министрі Азамат Әмриннің айтуынша, егжей-тегжейлі талдауға сәйкес ҚҚС мөлшерлемесінің өзгеруі көлеңкелі экономика деңгейімен тікелей байланысты емес.
"Мысалы, 2006 жылы ҚҚС мөлшерлемесі 15 пайыз болған кезде ЖІӨ-ге шаққанда көлеңкелі экономиканың деңгейі 19,8 пайыз, ал сауда саласындағы көлеңкелі экономиканың мөлшері ЖІӨ-ге шаққанда 2,7 пайыз болды. Кейінгі жылдары ҚҚС мөлшерлемесі кезең-кезеңімен 12 пайызға дейін төмендеді. Алайда саудадағы көлеңкелі экономика көлемі жыл сайын артып, 2016 жылы ЖІӨ-де 9,2 пайызға жетті. 2022 жылы ҚҚС мөлшерлемесі 12 пайыз болған кезде сауда саласындағы көлеңкелі экономика көлемі ЖІӨ-ге шаққанда 3,1 пайыз болды", - деп нақтылады вице-министр.
Сонымен қатар, спикердің айтуынша, ҚҚС ставкасының жоғарылауының инфляцияға әсері шамалы және бір сәттік болады.
"ҚҚС мөлшерлемесін 16 пайызға дейін көтеру инфляцияның жоспарланған дәлізден ауытқуына әкелмейді. Бұл инфляция деңгейіне 1 пайыздық тармақ шегінде әсер еткенімен, ауылшаруашылық тауарларына өз әсерін тигізбейді. Өйткені отандық ауыл шаруашылығы тауарларын өндірушілер жеңілдетілген салық режимдерін пайдаланады. Қазақстан импортының құрылымында 2022 жылы азық-түлік тауарларының үлесі 9,4 пайыз болғанын ескерсек, импорттық тауарлар бойынша ҚҚС мөлшерлемесінің өсуі инфляция деңгейіне айтарлықтай үлес қоспайды", - деді Әмрин.
Сондай-ақ, ол ҚҚС мөлшерлемесін көтерудің оң әсерін айтты. Бұл - әлеуметтік міндеттемелерді қаржыландыру үшін бюджет мүмкіндігін нығайту және отандық тауарлардың бәсекеге қабілеттілігін күшейту.
"Біздің ойымызша, импорттық тауарларға жүктемені арттыру - салықтық жеңілдіктер мен субсидияларды пайдаланатын отандық тауар өндірушілерге импорттық тауарларды алмастыру үшін өз өндірісін ұлғайтуға мүмкіндік береді", - деді ұлттық экономика вице-министрі.
Жаңа Салық кодексінің жобасын талқылау жұртшылықпен және бизнес-қоғамдастық өкілдерімен бірлесіп жалғасады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
