Қырғызстанның сыртқы істер министрі Қазақстаннан көмек сұрады 30 қазан 2020, 07:23
Қырғыз Республикасының сыртқы істер министрі Руслан Қазақбаев Қазақстаннан дәрі-дәрмек пен қорғаныш құралдарын сұрап, көмектесуін өтінді, - деп хабарлайды Tengrinews.kz тілшісі Қырғызстан СІМ баспасөз қызметіне сілтеме жасап.
Нұр-Сұлтан қаласына жұмыс сапарымен келген Қырғыз Республикасының сыртқы істер министрі Руслан Қазақбаев Қазақстанның сыртқы істер министрі Мұхтар Тілеубердімен кездесті.
Фото: Қазақстан СІМ баспасөз қызметі
Қырғызстан СІМ өкілі қаржылай-техникалық көмек көрсету мүмкіндігін де қарастыруды өтінді.
"Министр Руслан Қазақбаев қазақстандық тараптап Қырғызстанның Денсаулық сақтау министрлігіне қайтарымсыз негізде дәрі-дәрмек және қорғаныш құралдарын беруді сұрады. Сыртқы саясат ведомстволарының басшылары жүк тасымалдаушылар үшін Қырғызстан-Қазақстан шекарасында қолайлы жағдай жасау керегін атап өтті", - деп хабарлады Қырғызстан СІМ басшысы.
Фото primeminister.kz
Сонымен қатар, Қазақстанның премьер-министрі Асқар Мамин Қырғыз Республикасының сыртқы істер министрі Руслан Қазақбаевты қабылдады. Үкімет басшысы 2020-2022 жылдарға арналған Қазақстан мен Қырғызстан арасындағы ынтымақтастықтың кешенді бағдарламасының тармақтарын қоса алғанда, елдер арасында бұған дейін қол жеткізілген уағдаластықтарды іске асырудың маңыздылығын атап өтті.
Тараптар екі елдің сауда-экономикалық, инвестициялық, транзит-көлік, логистика, су-энергетика салаларындағы ынтымақтастығының жай-күйі мен перспективаларын, сондай-ақ пандемияның теріс салдарын азайтудағы өзара іс-қимылын талқылады.
Кездесуге ҚР сыртқы істер министрі Мұхтар Тілеуберді қатысты.
Қазақстан жаңалықтары. Соңғы жаңалықтар. Telegram желісінде бізге жазыл!