Мәжіліс төрағасы Парламент палаталарының бірлескен отырысын шақырды

Мәжіліс төрағасы Ерлан Қошанов Парламент палаталарының бірлескен отырысын шақыру туралы өкімге қол қойды, деп хабарлайды Tengrinews.kz тілшісі.

Отырыс жұма, 26 маусымда Астанада өтеді.

"Қазақстан Республикасы Конституциясының 58-бабы 4-тармағының 2) тармақшасына сәйкес Қазақстан Республикасы Парламенті палаталарының бірлескен отырысы 2026 жылғы 26 маусымда сағат 10.00-де Астана қаласында шақырылсын", - делінген өкім мәтінінде.

Алдағы отырыстың күн тәртібі әзірге нақтыланған жоқ.

Мән-жайы

Бұған дейінгі Мәжіліс пен Сенаттың бірлескен отырысы 20 мамырда өткен болатын. Онда депутаттар екінші оқылымда алты конституциялық заңды - Президент туралы, Құрылтай және оның депутаттарының мәртебесі туралы, Қазақстан Халық Кеңесі, елорда мәртебесі, әкімшілік-аумақтық құрылым туралы заңдарды, сондай-ақ басқа да конституциялық заңдарды жаңа Конституцияға сәйкестендіретін түзетулерді қабылдады.

Қазақстанның жаңа Конституциясы 2026 жылғы 1 шілдеде өз күшіне енеді. Бұған дейін қабылданған заңға сәйкес, Құрылтай қазіргі қос палаталы Парламенттің құқықтық мирасқоры болады. Жаңа бір палаталы заң шығарушы орган депутаттарының сайлауы тамызда өтуі тиіс.